吳千語激嬲毛舜筠鬧到拆天
黃百鳴力捧的「少女楊采妮」吳千語於新片飾演內衣設計師，除了令她贏得與林峯的緋聞外，更獲好戲之人毛舜筠及鄭中基教路。與毛舜筠有不少對手戲的千語，坦言拍一場鬧交戲時令她獲益良多。
吳千語因拍電影《男人如衣服》與Chok王林峯傳出緋聞，但她未有介意，緋聞就如衣服款式一樣，過時便沒有人留意。其實除了這個講到口水乾的緋聞男友外，千語亦獲同片多位演員悉心照顧。她說：「呢齣係我第三部電影，今次感情戲比較多，仲有好多同屋企人嘅感情戲，多群戲之餘節奏又快，我喺毛姐（毛舜筠）同鄭中基身上都學到好多。」
學習專業態度
千語與毛姐飾演母女，她很感激對方用心教導，獲益良多。她說：「最難忘有場戲講我激嬲咗毛姐，雖然現實中我都試過同阿媽鬧交，但鬧到咁激，都真係第一次。好多謝毛姐好用心指導我。佢真係一位好專業嘅前輩，好多時埋位前十分鐘已經醞釀情緒，令我都學識咗呢種好好嘅專業態度。」
鄭中基累NG
千語笑指鄭中基雖然經常累自己NG，但她仍感激地說：「鄭中基天生有種喜劇感。我同佢喺戲中有矇矓嘅感情線，我見到佢個樣就想笑，加埋佢啲動作、表情同眼神，搞到我成日被佢累到NG，但我都學識咗拍喜劇嘅節奏。其實每次拍戲都係一個成長，我仲有好多嘢有待進步，希望慢慢累積經驗。拍過幾次喜劇後，下次想拍動作片，揸槍做殺手。（易受傷破相喎！）拍戲受傷預計唔到，自己小心提防。」
髮型：Aki@hair culture
化妝：Leo@Annie G. Chan
服裝：something else@Electric Sekki
文：影視組
攝：李廣成