薛凱琪天分搭夠kick唔跌
【龔凱欣北京直擊】歌手薛凱琪行時裝騷，出師不利，出場險些仆倒，幸機警無當眾出醜，之後笑言有不跌絕招，大有天分擔任模特兒。
薛凱琪、鄧麗欣、陳喬恩、劉羽琦、韓國型男Dennis O、羅可旋等前晚現身北京，出席時裝品牌bread n butter 2012秋冬新品發布會。薛凱琪以特別嘉賓身份擔任模特兒行騷，穿上五吋高跟鞋的她，一起步便險些絆倒，幸好有驚無險，及後她更表現豪放，以佻脫的步伐，不時舉高雙手行騷，十分享受。
事後她不忘自嘲：「我好有天分，識得喺台上係點kick都唔會跌倒嘅絕招！」她又解釋說：「因為地下有一條管凸起咗，本來我有諗過繞過佢嚟行，不過會好奇怪，最後都決定試一試，點知都係kick咗一kick，不過我一上台就冇事，反而仲興奮。」
鄧麗欣打石膏
而剛接受「趾公外翻」手術不久的鄧麗欣打着石膏到場，還即場抽起長裙，展示包紮好的傷口位置，她透露本來也有份行騷，但因不能穿高跟鞋而放棄，她謂腳傷直接影響收入，推了不少工作。問她男友方力申可有特別照顧？她說：「佢好好，會車我周圍去，做司機。」現她主力在內地工作，有否富二代追求？她說：「冇喎，我好努力咁識緊，講笑啫！我好自閉，好少出街，冇乜識到朋友。」問到她是否已認定小方為終身伴侶？她避重就輕地回應：「大家都係做呢行，都明白。（有冇諗住幾時結婚？）冇諗過，我哋大家都知唔會咁快，想做好工作先。」而老闆娘羅可旋透露是次花了七位數字舉辦時裝騷，坦言正全力拓展內地市場。
文：名人組