吳嘉龍追女 唔吼圈中人
有說男人到了三十五歲以上，才會漸漸成熟，陳嘉容（Eunis）對此絕對認同，前輩吳耀漢之子吳嘉龍（Carl）以前予人感覺總是吊兒郎當，事業上只算中規中矩，三年前他毅然跑到新加坡發展，展開大男人的人生，整個人忽然長大了。
吳嘉龍：吳 陳嘉容：陳
星洲發展 思家念雙親
陳：今次好開心請到Carl做我嘉賓，知你今年大多數時間都係喺新加坡拍劇，今次都係飛返嚟兩日又要走。
吳：係呀，我三年前去咗新加坡拍一部當地嘅電視劇，因為第一輯反應好，當地電視台叫我拍第二輯，今次返去係拍第三輯。我已經好耐冇返香港，好掛住屋企人呀！
陳：掛唔掛住女友？
吳：我依家冇拍拖，拍唔到，成日喺嗰邊都唔想拍拖住，拍戲已經好忙，每日都要開工等埋位，而且角色中我飾演警察，好多動作鏡頭，所以都幾辛苦。
陳：喺新加坡拍戲有咩唔慣？
吳：其實真係有啲唔開心，細個反而唔會有呢種感覺，但人大咗就會掛住屋企，老竇、阿媽年紀唔細，好想多啲陪佢哋，可能心態真係唔同咗，後生嗰陣點闖都唔介意，但依家知道親情嘅可貴。
陳：會唔會想快啲結婚？
吳：冇對象喎，其實我依家做人好簡單，最緊要屋企人開心同健康，就算錢少都唔重要，錢買唔到健康，屋企人身體健康好緊要。
結婚生仔 仲未有對象
陳：你36歲已屆適婚年紀，真係冇對象？
吳：真係冇諗過，你知啦，要遇到一個啱嘅女仔，性格係一個重要問題，timing亦係問題。
陳：你要咩條件先？
吳：我只係有一個條件，就係一定唔會同圈內人拍拖！
陳：點解呢？
吳：太麻煩喇，以前試過一次，每日出街都好似做宣傳咁，又要扮到好靚，好似每一日都演緊自己嘅故事，好假！我寧願同普通女仔發展，起碼唔會咁大壓力！
陳：外表呢？
吳：冇所謂，如果你嫁個老公，好不幸佢意外燒傷咗，你會唔會唔要佢吖？
陳：唔會，因為我愛呢個人！
吳：所以好多嘢唔可以睇表面！
陳：但你咁嘅外形應該吸引好多女仔埋身？
吳：係呀，去club時時都有女仔走埋嚟，但我唔會企喺度畀佢撩，我會去跳舞，甚至男仔都有。其實我都會結婚生BB，但香港樓唔平，一定要有一筆錢！
有新目標 出自家品牌
陳：咁你爸爸有冇催婚？
吳：冇，呢方面佢好開通，老竇仲叫我唔好結婚！唔知點解佢會咁講。但佢同媽咪關係好好，有好多共同嗜好，例如會一齊行山、旅行，我覺得兩個人最緊要舒服，有共同話題，要夾先可以長久。
陳：我都覺得啱，成世人流流長，如果兩個冇共同嗜好，慢慢變得冇話題，感情都會變淡。
吳：佢哋仲成日同班七十、八十年代嘅朋友一齊食飯，感覺好快樂，所以可能佢覺得我未有呢種時間同修行，所以叫我唔好結婚啦！
陳：咁你依家有咩新目標？
吳：好想做一個品牌出嚟，其實依家已經籌備緊，不過我反而唔想畀人知道呢個品牌就係我嘅，唔想畀人覺得我係藝人先幫襯我，正所謂人怕出名豬怕肥，如果有啲用心不良嘅人要搞事，藝人會比普通人麻煩。
文：呂曉風、一蚊
攝：黃叔榮
服裝：Yo Luk（陳嘉容）
髮型：Derrick@queens private i salon（陳嘉容）
場地：Zip Cafe