莊思敏戀上重口味

失戀大過天，每個人都有一首屬於自己的失戀之歌，莊思敏失戀時愛聽Eason的《重口味》；胞妹莊思明每次聽周華健的《終於》，都會喊到收不到聲，反而已為人婦的徐濠縈，原來一直視情歌王子張信哲和李克勤為失戀歌之王。

莊思敏：「失戀我鍾意遊車河，聽極速快歌，又冇話特別鍾意聽邊首，睇嗰期興啲咩，不過都係鍾意聽男仔歌，近期咪聽Eason嘅《重口味》囉。」

莊思明：「我反而鍾意聽慢歌，你見我行步路都慢過人就知，周華健嘅《終於》我每次聽到必喊，唔只係失戀聽到先喊，首歌一路都好sad，後尾講主角終於醒覺。」

陳煒：「其實我失戀通常唔聽歌，反而戀愛中或曖昧時先聽，最鍾意聽譚詠麟嘅《愛在深秋》，嗰時十幾歲，情竇初開，我又係秋天出世，好有意境。」

貝安琪：「我鍾意聽90年代英文歌曲，會令我諗番關於愛情嘅嘢，其實我好鍾意聽歌，好聽就會聽。」

李嘉欣：「失戀嘅時候會聽啲慘情歌，不過我已經好耐冇失過戀。以前會聽我有份參與嘅電影《墮落天使》嘅主題曲《忘記他》，啲歌詞寫得好好，會諗番起好多往事。」

徐淑敏：「我好鍾意聽周杰倫嘅《不能說的秘密》，嗰陣時啱啱失戀，一聽呢首歌就喊到收唔到聲，諗起自己點畀人傷。」

周汶錡：「通常唔開心會聽啲開心嘅歌，不過陶喆嘅歌我就百聽不厭，車又聽屋企又聽。」

劉心悠：「鍾意電影《closer》（誘心人）主題曲，聽親呢首歌都會代入戲裏主角，覺得自己好慘，抒發情緒好有效。」

羅力威：「鍾意聽日本歌手桑田佳祐，唔一定失戀先聽。」

徐濠縈：「自己好老土，當年鍾意聽情歌王子張信哲同李克勤，所有佢哋嘅歌都鍾意。」