洪天明紅底催旺 煲爆八千萬六合彩

洪天明及周家蔚婚後不久即造人成功，將為人父的天明正努力在內地拍戲搵奶粉錢，日前回港的他被發現獨自現身北角，並撇甩大肚老婆到服裝店閒逛，更專攻紅色Boxer，認真耐人尋味！

嚴選投注站

身穿紅Tee的天明其後到馬寶道投注站門外駐足，凝視有關周二8,000萬六合彩金多寶的海報，似乎為免星期一、二人多排長龍，天明思索一會後便入內使用自動投注機投注，其後又自度號碼買自選數字彩票，實行漁翁撒網博贏彩金！當他離開時見有風車綁在柱上，亦忍不住出手轉幾下催運！準爸爸天明之後步經藥房，即被琳琅滿目的奶粉「吸引」，期間見有孕婦與店員分析各品牌的優劣，天明亦從旁偷聽，為榮升父親做定功課。

忙搵奶粉錢的天明在藥房研究奶粉。	天明買定紅底，谷行旺氣。	天明一入投注站，即急不及待到自動投注機投注。

事後天明接受電話訪問表示因知道彩金高達8,000萬，故親身返港買個運氣，並選擇去年印度人阿星贏頭獎的馬寶道投注站，問到有何心水號碼？他說：「都係我同家蔚嘅生日組合，好似1、7、8、25呢幾個。（會點使筆彩金？）希望做投資，首先會買樓。」家蔚則笑言特地提醒天明返港買六合彩：「雖然有用開戶口買，但佢就做老竇旺啲，所以要親自買！真係中的話，會一半買樓投資，一半畀BB同家人，成立書簿費基金！」

除了買電腦飛，天明還自填號碼投注。	天明着鮮色衫投注，希望為ＢＢ開拓「錢」路。	步出投注站，天明即轉轉風車。

大鼻利橫財

堪輿學家麥玲玲認同天明穿鮮色衫及紅底有當旺作用，加上最近有喜事，相信旺氣十足，李丞責則表示穿紅底在民間具吉祥意味，但要配合面相，眼大、鼻大及後尾枕大都屬橫財命，而「大鼻族」天明亦甚有機會。

文：影視組