猷君四哥上身 娘鬥十両金

前晚利孝和夫人的女婿雷禮權舉行53歲生日派對，並以「勁大娘」為主題，邀請百多名好友一齊以「娘爆」造型參加派對，賭王何鴻燊與四太梁安琪的兒子何猷君一身紅色西裝look加黑超，十足四哥謝賢，「九巴後人」雷兆光仿八両金，自創「十両金」打扮，名媛李桂蘭就化身中環區的菲律賓公主，雷禮權囡囡雷正殷變身懷胎八月的未婚媽媽，場面搞笑！

主人家雷禮權戴滿全身朱義盛，臉上加上兩大粒有毛的假癦，還以箕筲裝假肚，十分抵死，他說：「我呢個係五世祖造型，全晚會有七個唔同造型，上一道菜就換一個look。」

雷禮權一家四口齊扮嘢，更與女兒正殷鬥大肚。	謝賢	雷禮權（左）的造型連霍震霆也忍俊不禁。
林嘉寶（右）與母親林李婉冰結伴。	李桂蘭笑言係中環區的菲律賓公主。

鮮紅西裝金鏈戒指

猷君的造型甚有心思，他戴上金牌頸鏈及戒指，又專登將價錢牌釘在西裝外，加上鮮紅色勁娘西裝，他笑言：「我喺屋企搵最娘嘅衫着上身，金頸鏈同戒指係阿爸阿媽嘅，着到咁誇張都係第一次，好在頭先喺正門入嚟冇畀人笑。（你好似謝賢。）唔係我講，係你哋講o架咋！（都似謝霆鋒。）我冇佢咁靚仔。」

林嘉寶否認拒猷亨

早前傳被猷君胞兄猷亨暗戀的林嘉寶與母親林李婉冰結伴到場，嘉寶稱與猷亨是由兩歲已認識的好朋友，有指她拒絕猷亨求愛？她否認：「冇，我哋有朋友嘅愛。（傳佢迷戀你，所以搵女友都要似你？）佢女友靚我好多，瘦我好多。」至於霍震霆以一貫造型到場，問他為何沒有扮嘢？他幽默地說：「我行落嚟已經夠老土啦！」

文：名人組