楊秀惠開齋女開P唔預男賓
楊秀惠近日舉行「齋女」生日派對慶祝28歲牛一，單身的她收到不少朋友送上驚喜的生日禮物，而她亦揚言單身都可以過得快樂，因此今年生日雖然開派對慶祝，卻清一色都是女生。
最近28歲生日的藝員楊秀惠相約一班圈中好姊妹包括周家蔚、李思欣、梁靖琪及圈外朋友舉行全女班派對慶祝生日，早前甩拖的秀惠表示：「生日嗰日其實好多男仔朋友都話想嚟，但係為咗佢哋好，驚畀人影到亂寫影響佢哋，所以就全女班慶祝生日，成班女仔一齊傾吓偈，食吓嘢都玩得好開心。」
獲贈電飯煲
今年生日秀惠收到的禮物特別多，包括有手袋、首飾、化妝品，最特別的要數印有她名字的波鞋、粉絲自製印有催促她趕快出嫁字樣的T-shirt，連電飯煲也收到，她說：「屋企人都神神秘秘喺馬來西亞速遞咗份禮物畀我，今年生日過得好開心，直情感動到喊，單身都可以好開心。」
盼擊退病魔
楊秀惠最近身體出現問題，胸口感不適又不時見暈，連同胃酸倒流影響消化，體重直線下降，近日秀惠到醫院作詳細檢查找出病源，證實是患上胃炎，她說：「今年嘅生日願望特別想身體健康，胃炎都長手尾，要食成一個月藥，之後要慢慢調理好身體。」
另外，楊秀惠在將上映的重頭劇《造王者》中飾演深愛敖嘉年的妻子，戲中為愛郎喊得死去活來，幸好秀惠是名副其實的「大喊包」，喊戲對她而言沒有難度，秀惠說：「由細到大都好感性，少少嘢都可以喊餐飽，啲喊戲簡直為我度身訂造。」
文：影視組