Monna怪病纏身無力戴Bra
當一眾o靚模於書展後繼續諗計搏殺搵銀時，「混血E神」林宜芝（Monna）的身體卻響起警號，更要把工作叫停，昨凌晨她突然於微博表示患上「吉巴士綜合症」，並將要入院接受治療，兼每日打點滴，她寫上︰「又要再入醫院了，上一年的吉巴士綜合症又復發了，每日要吊藥六小時的日子我以為不用過了。天哪！受不了啦！我不想和你們分開，不想放下工作。」但其後則匆匆刪除微博。
澳洲工作發病
昨日致電Monna求證，她直言確有此事，更指去年於澳洲工作時因腳感到麻痹冇力，「連環仆」後睇醫生發現此病，她說︰「上年去澳洲做嘢嗰陣，隻腳成日痹，仲經常仆落地搞到損手爛腳，之後睇醫生先發現。」她表示於醫院經過一星期吊「丙種蛋白球」後已經痊愈，但想不到現在似是病發，受麻痹部位由腳轉到手，她說︰「書展前返公司拎寫真，隻手已經冇力，當時以為冇乜事所以冇理，點知近排愈嚟愈嚴重，依家隻右手接電話同戴Bra都唔得。」
將抽骨髓化驗
Monna表示醫生擔心這個病復發，故將安排她入院抽骨髓化驗，她說︰「其實呢個病同杜汶澤個病差唔多，都係影響神經，醫生怕會蔓延到頸椎神經影響呼吸，所以要我快啲入醫院檢查，依家安排緊，我都好擔心！」
文︰專案組