大同牛一 薛凱琪催瞓覺
唱作歌手方大同日前和逾百fans舉行聚會，fans齊送上「聽」不到的生日歌為偶像補祝生日，既特別又具意義，他又透露緋聞女友薛凱琪（Fiona）為他挑選了磁石貼作禮物，助他容易入睡。
大同早前和過百fans搞生日會補祝他7月14日的29歲牛一，除狂收禮物外，最驚喜是fans以手代口送上生日歌，他說：「我之前嚟過呢間社企嘅素食餐廳食嘢，知道呢度係僱用聽障人士，覺得好有意義，所以生日會都嚟呢度搞，fans仲學埋手語同我『唱』歌生日歌，等啲聽障人士都可以同我哋一齊玩，（你識唔識手語？）唔識，一陣學。」
歎咖喱夠浪漫
大同今年生日一如以往要在工作中度過，但覺得相當特別，皆因有5千人齊大合唱生日歌外，還有Fiona相伴，他說：「因為嗰晚我喺馬來西亞開演唱會，全場人都唱生日歌賀我，Fiona就做嘉賓。（Fiona送乜生日禮物畀你？）有助睡眠嘅磁石貼，（你失眠？）唔係，但都係有用嘅健康產品，不過仲未用，因為我未研究說明書。」他又謂尚未和Fiona食生日飯，不過之前一齊食印度菜，有人唱歌、跳舞，非常浪漫。
爆肺唱歌見痛
問到生日願望，大同說：「身體健康，因為兩次爆肺後，有時唱歌都覺得有啲痛，唱得好辛苦。」而另一個願望是放大假，原來入行7年的他，從沒放過長假，故希望年底完成工作後，可以安心放大假，好好休息調理好身體。
採訪：音樂組