黃德斌拒幫手 任小強嚇女友
向來喜歡踎大牌檔的型男黃德斌，日前忽然「升呢」與女友Joyce及數名友人到灣仔歎日本菜。食至中段，德斌孖住女友及女友人到附近便利店購買雪糕，折返餐廳時，眾女突然看到街上有曱甴，嚇得即時大叫雞飛狗走，大隻仔德斌竟未有出手相助，反而站在一旁陰陰嘴笑！
入行24年的黃德斌，自06年憑無綫劇《火舞黃沙》騷42吋巨胸成功上位，劇集一套接一套，更由茄喱啡當上男主角，酬勞亦隨即倍增，前年他更打本十萬元，給拍拖多年的女友Joyce開設時裝店。
中段外出買雪糕
雖然他近年賺了不少，但卻十分慳家，平時喜歡與女友拍拖到大牌檔撐枱腳，未有大魚大肉。踎慣大牌檔的德斌，日前忽然「升呢」與女友及數名男女朋友到灣仔一間日本餐廳晚膳。食至中段，戴帽及眼鏡、一身便服打扮的德斌，與女友及一女友人步出到附近便利店購買飲品及雪糕，當他們折返餐廳時，女友Joyce發現梯級上有曱甴即九秒九掉頭走，旁邊的友人見到亦嚇得即時大叫兼彈開，表現鎮定的德斌只在旁陰陰嘴笑，未有出手相助。
凌晨二時仍吹水
過了一會，Joyce再走近餐廳附近，肯定曱甴「消失」現場，再兜圈返回餐廳用膳。眾人食至凌晨２時許才捨得埋單，並繼續站在門外吹水。數分鐘後，德斌當「柴可夫」載女友及一男友人離開。
文、攝：追蹤組