馬德鐘遭吐口水尊嚴掃地

當年我受同樣當差嘅兩位哥哥影響，我考警察，從軍裝做起，之後我做過PTU亦當過G4特警。呢個係警隊入面嘅特別部門，為保持體能，就算冇行動都要成日訓練，嗰種辛苦，係血、汗、淚水再加尊嚴嘅過程。依家我拍《飛虎》，真係令我勾起好多回憶，好似發夢都夢見衝鋒陷陣，今次拍劇，呢啲感覺又返嚟！　

訓練EQ保持冷靜

入隊後，每日都要訓練。講真，真係辛苦過拍劇！年輕唔懂事時，都有諗過放棄！譬如會傻更更想個天落雨，我就可以跑少日，操少日，雖然話後生有無窮精力同體力，但始終人嘅體能有極限，真係唔易捱！細個時少啲耐力、堅持都過唔到咁辛苦嘅訓練。今次我拍劇集，同一樣嘅性質，到我train佢哋（演員），當然冇咁嚴，起碼我會顧及同事嘅尊嚴。

馬德鐘拍《飛虎》時經常衝鋒陷陣，令他回憶做公僕的日子。

馬德鐘不藏私，將當差經驗分享給同劇演員宣萱。

想當年我受訓，阿Sir好嚴格，我哋要赤裸上身，互相練拳腳（打架），因為要自衞。有一次輪到我做班長，阿Sir喺我面上吐口水，逼我要對某一種睇法要服氣，因紀律部隊都要絕對服從order！事後我真係好hurt、好唔服氣，不過阿Sir後來向我解釋，呢個係訓練過程，係一種EQ嘅訓練，因為當我哋遇上歹徒，會有好不人道嘅挑釁，阿Sir要我哋保持冷靜，否則驚我哋會隨便揸支槍去打死人！

馬德鐘為了令生活增添色彩，加入娛圈實踐夢想。	曾經當差的馬德鐘，揸槍有姿勢有實際。	為了應付動作場面，馬德鐘經常做運動鍛煉體能。

尊崇使命服務市民

拍劇當然冇呢個情節，但其中一幕戴「豬嘴」（防毒面具）都好深刻！因為我根據過往嘅經驗，拍時都畀咗好多意見，想大家睇起上嚟都有種真實感覺。而今次我拍攝時就等同訓練一樣，我都瘦咗六、七磅，可能我向來都有做運動，所以成個拍攝都應付到。

雖然受訓之時好辛苦，當時唯一說服自己留低，係當差嗰份使命感，話晒係為國家、為香港人民服務，做警察好威，G4更加係精英中精英，做男人點會唔尊崇呢種感覺呢？

轉做藝人多姿多采

當差四年，我做過軍裝、藍帽子、G4，都算無憾，最後轉行加入無綫，因為我覺得人生應多番啲色彩，做藝人就最能夠實現呢個夢想。不過我雖然做咗藝人，但我都好贊成男人應該有服兵役嘅理念，可以鍛煉下自己。好似我個仔咁，佢成日都好興奮咁問我當差時嘅嘢。雖然我個仔未有當差念頭，但佢對槍械好有興趣，而且有學空手道，依家係黑帶二段o架！

口述：馬德鐘

筆錄：影視組

服裝：BOSS Black