周永恒日日都係父親節
「有女萬事足」的前歌手周永恒（Roy），自女兒周信希出世後，雖然少了和老婆趙頌茹享受二人世界，但Roy多了家庭溫暖；Roy表示不足兩歲的信希，曾主動拎鞋給他着，令他感動到眼濕濕！
周永恒與趙頌茹（阿Yu）前年誕下千金信希，最近阿Yu再度懷孕，據悉今胎也是囡囡，令他們大感興奮！日前Roy、阿Yu和女兒信希享受家庭樂，精靈活潑的信希紮紮跳，又狂擺甫士，表情多多，她又同爹哋咀嘴；快將做家姐的信希相當聽話，不時親親媽咪的大肚，相當可愛！
少點甜蜜多點溫馨
現年28歲的Roy，早年捲入毒品案，再加上腦部曾生水瘤，令他跌入人生低潮，不過自女兒出世後，令Roy重獲新生。父親節將至，Roy說：「我唔係好識分節日，日日都一樣，個女依家仲細個，好精靈，又識擺甫士。」
雖然女兒出世後，少了跟老婆享受甜蜜世界，惟兩公婆毫無怨言，Roy說：「係冇咗自由時間，湊女少咗自由，但多咗好多歡樂，佢依家兩歲未夠，最感動係有次佢拎鞋畀我着，真係感動到喊，有時做完嘢返嚟好攰，但望到佢就醒晒，唔係第二啲物質關係代替到，佢係無價寶。」
有禮獨立非「港孩」
Roy又激讚囡囡醒目，識睇「眉頭眼額」：「當佢知道我哋唔舒服，反而佢會喊，真係心都甜。」問到會否擔心寶貝女成為「港孩」？Roy說：「唔擔心，佢自己已經識着襪及着鞋，基本禮貌都有，佢都算獨立。」
對於阿Yu快再添丁，信希亦自知將會做家姐，Roy表示將來也想繼續做爸爸，但還是順其自然。至於Roy曾捲入毒品案及腦部生水瘤，他說：「好多嘢學識交託，交畀我嘅神，交託完冇Worry。（會唔會同個女講自己捲入毒品案？）等佢到咗一個階段，會直接同佢講。」
採訪：戶冊平
攝影：謝國華