謝賢回顧舊作：直頭想嘔
四哥於五十年代入行，拍過不少電影和劇集，他自嘲沒有演技：「睇番舊時啲戲，直頭嘔呀！」他只懂講對白「我愛你」，甚至拍危險場面都沒有為演員買保險。相反現時電影製作認真，可讓演員搏命，兒子霆鋒就是好一個例子。
我嗰時入呢行，係機會，唔係因為個樣，我係第二代香港電影人，第一代你知唔知係邊個？蝴蝶、白燕嗰啲，佢哋當時開始年紀大，中國嗰時50歲以上已經係老人家，70歲就古來稀，而我嗰陣就啱啱入行，又高大威猛，嗰時又唔使識做戲嘅，高大威猛靚靚仔仔就得。我真係一啲都唔好戲，睇番舊時啲戲，哎呀啲劇情呀、製作呀，直頭嘔呀！講句「我愛你」咁又賺一套戲啦。
以前個圈好簡單，拍完戲就返屋企或者出去玩，同個電影圈冇來往o架，唔同依家，拍完戲要同個導演研究吓呢度點樣個Shoot又點樣，我嗰陣冇呢個需要嘛，你知唔知呀，當時電影製作又曳，導演又差，有時我都唔敢同人講我係電影明星啦，哈哈。
皮包鐵出事遭唾罵
依家啲演員會參與電影製作，霆鋒點解會有今日（成就）？佢真係好認真，佢好搏命，我話搏命係應該，但安全第一，你認為安全咪搏命囉，我以前都搏命o架，但我以前嘅配備好曳，依家佢搏命有得買埋保險，以前？我電單車飛落海呀，都冇保險買呀！我真係飛過電單車落海o架，嗰套戲我都唔記得叫乜鬼添呀，我自己提議飛落海嘅，結果冇事。我鍾意揸電單車嘛，自從有孫之後，先賣咗咋嘛，我驚我跌親仆親，會畀人講粗口話「抵×死呀！孫都有埋仲揸電單車？」
「我冇機會去搏」
霆鋒搏啲定我搏啲呀？我都冇乜機會去搏，但佢有咁嘅條件去搏嘛，唔通依家叫我喺8樓跳落嚟呀？霆鋒冇呻過拍戲辛苦，後生仔好好勝嘅，有時就話「哎呀啲骨哎呀呀，歪咗。」不過自己保養番咪得囉，我會做模範畀佢睇，有啲我呢個年紀嘅人又話呢度痛嗰度痛，聽日又入去醫院檢查，咁就×街啦，係咪呀？
口述：謝賢 筆錄：名人組