寶珠:天經唔係裙腳仔

陳寶珠愛子「經經」楊天經遺傳了母親的孝順基因,對媽咪及外婆宮粉紅必恭必敬,好事之徒卻譏他為「裙腳仔」,寶珠愛子心切,揚言:「天經絕對唔係『裙腳仔』!」

天經唔係「裙腳仔」,佢係個有主見嘅人。佢有時會問我意見,但問完,佢會自己衡量,或者因為佢見到我對媽咪言聽計從而受到影響。再講,你情願有個聽話嘅仔,抑或有個忤逆仔呢?

有時天經都會同我講佢工作嘅事,我會開解佢,但我冇聽佢提過出面有人話佢係「裙腳仔」,我相信就算真係有人咁講,佢都唔會當係一回事,佢會話:「人哋講咪由得佢。」我亦從來冇為呢啲嘢唔開心,因為我好清楚天經絕對唔係咁嘅人。

新抱相處由心出發

當日佢要入行,我講到明唔會為佢搞關係,但佢鍾意呢行,亦都想喺娛樂圈做出一番成績,我覺得佢講波、做主持、演戲都好有天分,唱歌亦都好好聽,絕對有能力多方面發展,但我一向好少同圈中人聯絡,佢冇埋堆又冇人捧,要成功係好難o架!尤其依家咁多新人,更加講究天時、地利、人和,佢係完全要靠自己努力。

其實好少男仔好似天經咁有觀察力,呢樣都幫到佢演藝工作。譬如佢見我唔舒服,就會好緊張、會哄我去睇醫生;見我唔開心,又會以為自己激嬲我,所以我唔擔心佢喺出面工作會遇到大問題。

就算我同新抱(吳文珊)相處都係畀個心出嚟,最重要係令佢知我當佢女一樣,我哋成日傾偈、講笑,又畀機會佢畀意見,只要大家知道自己身份、應該做啲乜,由心而做,咁關係自然好!

我雖然好鍾意小朋友,但抱孫都係隨緣,並唔心急,因為要培育一個小朋友係好艱辛嘅事,精神同經濟付出好大,責任好重,做父母要三思。

口述:陳寶珠 筆錄:影視組