谷祖琳拍阿媽搞私房菜
谷祖琳（小谷）除於大坑開設糖水舖外，早前小谷更與母親再於附近開私房菜「谷媽媽小廚」，進軍飲食業，而且短短幾個月已忙個不停，招牌水餃做到無停手，兩人坦言滿意成績，問小谷為何母親決意開舖頭？原來她的家族是廚藝世家，她說︰「我媽咪煮嘢食好叻，平時屋企食飯都有幾圍枱，煮好多餸。因為佢未嫁嚟香港之前喺台南住，我公公婆婆煮台南小食又好勁，所以媽咪由細到大都有學廚。」
小谷更表示開食店是母親的心願，她說︰「我都係之前同媽咪傾偈，先知道佢細細個就想開間私房菜，咁我見自己樣樣OK，經濟亦可以負擔到，所以就決定開舖。」不過她直言經營食店其實也有點辛苦，她說︰「其實創業易，守業難，成本加價，又要keep住啲水準，加上又難請人呢！」此外，這間私房菜更有一條龍服務，食飽飯亦可落單叫小谷附近糖水舖的甜品吃，而且還有專人送上，難怪她表示開店不久生意做不停呢！
百忙抽空親力親為
小谷平時要兼顧演藝事業，返電台開咪及拍戲已經忙個不停，雖然糖水舖和私房菜生意滿意，但小谷不用工作便會返店幫手打點，她說︰「一有時間就會返去幫手，自己生意梗係着緊啦，不過有時埋數望住成疊單，真係幾頭痛！」