天華自信贏面大 嘉穎唔認輸
謝天華與鄭嘉穎今年成「視帝」大熱，天華雖然感到很大壓力，但仍顯得信心爆棚，自言「贏面大」；而嘉穎亦睇好自己飾演的「Law霸」，加上有不少同事的支持，令他甚為鼓舞。
台慶頒獎禮明日舉行，「視帝」爭霸亦進入直路階段。謝天華今年憑《潛行狙擊》角逐「視帝」，他坦言因有不少人支持，令他倍感壓力：「近排的確多咗好多強心針，行落街都有街坊叫我做視帝，不過我同佢講我未攞。（贏面大？）都係嘅，不過要睇好多方面，（贏啲乜？）天時、地利、人和，之前公司開第二集時，都冇諗過反應咁好，仲話開埋電影，所以好多嘢好似安排晒。」
隨時脫離戲行
天華視嘉穎為勁敵，他指嘉穎「Law霸」一角跟以前他所演的不同，給觀眾新鮮感，眼前一亮，這是嘉穎努力成果。天華坦言入行已覺自己幸運，今日的成績並不是遲來的高峰，他又不諱言深明此行的遊戲規則，花無百日紅，若有一日覺得不好玩，便會脫離做這行。
憑《怒火街頭》角逐視帝的嘉穎，雖然是另一大熱，但他表示現階段忙於拍劇，沒有時間多想台慶頒獎禮，心情反而不太緊張，說到不少民意與同事撐他，他謂：「其實民意呢樣嘢先係我最想要嘅，姑勿論出嚟結果係點，都對自己有交代。」
見到鎮宇即死心
問到「勁敵」天華，嘉穎謂：「天華係一個好勤力嘅演員，佢都默默耕耘多年，今年如果我唔係有『Law霸』角色，都會投佢一票，大家都想攞視帝，惟有作良性競爭，一齊努力。」
此外，嘉穎昨日出席活動時，對於有傳無綫請吳鎮宇任視帝頒獎嘉賓，造就天華封帝，他說：「咁頒獎禮嗰日見到鎮宇，我就死心。大熱倒灶都冇法，唔係我控制範圍，都好睇公司內部，我唔理結果，過程已盡力。」
文：影視組
攝：劉智源（謝天華）
攝：吳文聰（鄭嘉穎）
服裝：Beauty&Youth United Arrows（鄭嘉穎）