祖兒即場申請硬食Jan檸
容祖兒（Joey）雖然貴為樂壇天后，但亦不是樣樣都隨心所欲，昨日她向林海峰（Jan）「申請」讓其老婆彭羚現身黃偉文（Wyman）演唱會跟她同台合唱時，就遭Jan即時婉拒。
Joey為撐「首位令她有事業線的男人」Wyman，昨日身穿閃爆粉紅色珠片裙及戴上亮燈帽，跟林海峰及葛民輝出席《黃偉文作品展》記者會，大會宣布加開一場，由明年二月九日至十一日共三場。
Joey自言在Wyman的演唱會上想和彭羚合唱，故問彭羚的老公Jan可批准？Jan問：「唱幾多場先？一、兩場實蝕，要唱六、七場先回到本。」雖遭請食「大檸檬」，不過Joey未有介意，還代Wyman請Jan及葛民輝任嘉賓，結果兩人即場答應。Joey談及Wyman另一嘉賓陳慧琳（Kelly）在出騷時已懷孕七個月，她戲言：「可能會催生，可能唱唱吓生咗『七星仔』，好勁。」而Jan亦加把口謂：「唱唱吓可能聽到BB聲。」Joey希望未能跟彭羚合唱，就跟楊千嬅合作，更主動問盛傳與千嬅不和的Wyman可會請丁子高做嘉賓，Wyman就反問她：「你點知我冇搵？大家冇不和，甲乙丙太都有請。」
自嘲樣惡 睥走色狼
Wyman坦言至今未請千嬅，既怕遭到拒絕外，亦因自己未儲夠勇氣。他又說未跟Kelly直接對話，明白開演唱會不夠生BB大件事，如Kelly因懷孕而缺席，他會體諒。
此外，Joey亦有留意陳嘉桓受辱事件，慶幸自己入行多年未曾遇上同類事件，更自嘲與她相貌有關：「我個樣夠惡，一惡對眼好大，如果佢哋（色狼）一嚟就打開佢。」
文：音樂組