女人難以忍受的……劉心悠最怕大話情人

與伴侶和諧的相處生活，是一種藝術，個人的小習慣或性格，往往可能會令另一半介意或討厭。混血模Alice B.最憎伴侶嫉妒心重；羽翹則最不能接受對方不接電話；而劉心悠最不能忍受男友是大話精！

劉心悠（藝人）「如果我知道對方講大話，我一定會分手，我唔可以忍受佢呃我，除非佢有苦衷，否則就冇法做到信任。我算好好彩，從來冇試過因為咁同另一半分手，每次都係和平分手，因為冇法長距離戀愛。」

楊崢（名模）「如果對方做咗啲破壞我對佢嘅尊重同信任嘅嘢，就一定會分手。例如不忠或訴諸暴力都係唔可以接受。我喜歡男仔乾淨，如果佢唔整潔、唔鍾意沖涼洗頭，好難忍受囉！」

楊汀叮（模特兒）「如果對方有第三者，就一定唔可以！好在至今都未發生過。以前有個男友，佢每次壓力一大就會大力打牆，感覺好恐怖，好唔鍾意佢咁做，直情係虐待自己，我寧願佢做運動發洩！」

陳嘉桓（藝人）「我接受唔到男朋友唔鍾意我家人同埋唔孝順。仲有，一定要鍾意我屋企嘅四隻狗仔，因為我當佢哋係寶。其實男仔最緊要有三個心，就係愛心、孝心同關心！」

琦琦（名模）「我諗我接受唔到食食吓飯除鞋。有陣時出街見到有人咁做，就會覺得接受唔到。其實唔止伴侶，保持自己嘅儀態同形象，對任何人嚟講都好重要，係基本禮貌。」

Alice B.（第四代Canon甜心）「我好怕啲妒嫉心好重嘅男仔，如果佢禁止我同其他男仔講嘢，真係接受唔到！雖然着緊我係好，但過咗分就唔得。我以前識過一個咁樣嘅男朋友，我一同其他男仔講嘢佢就發脾氣，搞到我成日都好驚，所以好快就同佢分手。」

羽翹（歌手）「我接受唔到唔聽我電話。以前試過因為冇信心、懷疑男朋友同其他人喺一齊，打五、六十次電話畀佢，最後都係分手收場。依家改變咗，只會打一、兩次就唔會再打，如果佢唔覆，就唔會再聯絡佢。」

貝安琪（模特兒）「我好怕人哋搞到屋企好亂，因為我係個鍾意整齊嘅人。見到佢屋企立立亂嘅話，會忍唔住幫手執，但會愈執愈嬲！以前都識過啲好唔愛整齊嘅男仔，不過好快就拜拜。」