版稅風波有望解決 祖兒恨見克勤返無綫
陳志雲涉貪案獲無罪釋放，據知重掌大權的他，令無綫跟四大唱片的版稅風波有望加快於年底解決。消息指自志雲出事後，由集團總經理李寶安跟四大傾版稅，惟因李寶安是數口佬兼態度強硬，雙方一直僵持不下。
據知情人士透露，由於版稅案排期需時，雙方正洽談中期解決方法，在價錢上各有讓步，相信錢已不是關鍵問題，反而在合約上雙方卻堅持己見。四大要求旗下歌手可亮相其他電視台，無綫卻拒絕放生，故一直未傾掂數。不過，基於志雲跟四大關係友好，可望將問題迎刃而解。
克勤約食飯
就陳志雲被判無罪一事，身為昔日無綫契仔的四大歌手李克勤，前晚跟容祖兒出席籃球賽活動時，祖兒即雀躍問克勤：「咁你咪返到嚟TVB？我好想你快啲返嚟，可以熱鬧啲。」克勤笑說：「我係卒仔，交畀公司傾，不過作為朋友戥佢開心，我會約佢食飯。」
同為四大歌手的薛凱琪則說：「唔知佢無罪釋放，如果四大解決到係好事，市場細每個歌手都要平台宣傳。」
至於四大所屬的HKRIA的CEO鄭文超接受電話訪問說：「陳志雲同版稅冇關係，係公司對公司傾，大家唔好咁多揣測。」問是否有中期解決方法？他說：「商業談判要程序，雙方都有需要讓步，開價還價，依家律師起草文件，希望呢個月可以再傾一次，年底前可以解決。」