陳豪陳茵媺約會食飯嗌開心
陳豪與陳茵媺被本報踢爆兩人近期在深井「行宮」密會後，麥長青又證實兩人拍拖。雖然證據確鑿，但兩人昨日分別回應時繼續唱雙簧死口唔認拍拖，但又表示食飯約會好開心，果然心有靈犀似夾定口供。
昨日早上九時許，陳豪返抵將軍澳電視城為劇集《4 In Love》開工。提到好友麥長青踢爆他與陳茵媺的情侶關係，他說：「食飯啫，依傢都係約會嘅階段，但係開心嘅，我仲係住喺將軍澳㗎，冇咩『行宮』喎，只係去麥包屋企食飯。」
「大家感覺好好」
問到可會因今次被踢爆而減少與陳茵媺見面？陳豪說：「唔會，其實我哋一直都有約食飯，大家態度都大方嘅，低調係唔想畀人覺得我哋博宣傳。其實真係冇咩嘢要隱瞞，我咩都講晒出嚟。（只係差唔肯承認拍拖？）畀我哋約會多幾次先啦，依家大家感覺都係好好嘅，差在唔夠空間，希望大家畀多啲空間我哋啦。」
陳茵媺則在北潭涌拍攝《ATF反恐》自爆曬傷皮膚，問到陳豪可感心痛﹖她說：「都冇同人講。（佢都睇到啦！）點會喎。（麥長青踢爆你哋戀情！）我哋認識緊，食多幾次飯先啦，開心嘅。（幾時公開﹖）如果有呢個moment，最緊要正面同開心。」她又透露與陳豪傾電話時有談及「深井事件」，但否認有夾口供。問到抗不抗拒同居？陳茵媺笑謂唔識答。
佘詩曼讚郎才女貌
另外，陳豪過氣緋聞女友佘詩曼昨日與黃德斌開工，阿佘表示未有向陳豪八掛新戀情，不清楚他們是否拍拖，但覺得陳豪與陳茵媺確是郎才女貌。文：影視組