李曼筠愛人無數
愛情的神奇之處，是可以消除任何界限，不過忘年戀未必人人可接受到。張智霖直言姊弟戀一定備受壓力，而顧美華自爆曾遭三十多歲男士垂青，亦即避之則吉。相反「動漫Maggie」李曼筠全盤接受忘年戀，愛人不計歲數，就算對方比自己年長廿年都冇所謂，認為年紀愈大代表人生經驗愈多，思想更成熟。
《apm達人夜書市開鑼活動》
李曼筠
「一向都喜歡年紀大嘅男士，就算大我十年或廿幾年都可以接受。因為年紀大代表人生經驗豐富，思想成熟。最經典忘年戀例子一定係甄子丹，佢外表又後生。」
徐靖雯
「唔係太接受到忘年戀，我只可接受到最多係大自己十年，如果大十五年真係唔得。最令我深刻嘅忘年戀係甄子丹同汪詩詩，佢哋相差十八年，但佢哋好開心。」
《UNiART時裝設計展》
蔡恩真
「年齡唔係一個問題，不過如果對方太老而冇活力同我玩咁就唔得，同埋我好鍾意運動又鍾意出街，所以佢一定要好有活力。」
《手袋活動》
廖碧兒
「愛情係冇年齡嘅界限嘅，最重要係兩個人啱Key。我都識得啲Auntie、Uncle相差十年八年，都相處得好好！」
林 莉
「最盡只可以接受到大自己十年，重點係健康問題，如果對方年紀大自己太多，怕會影響將來生小朋友。」
《星光熠熠耀保良》記招
泳 兒
「年齡唔係大問題，最緊要係兩個人思想接近。如果對方大我十年以上，我ＯＫ o架，思想成熟啲嘛，反而細過我十年就唔得啦，我鍾意成熟嘅男人。」
張智霖
「忘年戀睇戲就好睇，現實生活會好大壓力o架，如果係男人大啲，社會都容易接受啲，相反係女人就會好夢幻囉，你估小龍女同楊過咩！」
《護膚品活動》
董晶怡
「哈！你係咪話我？老公（龐維新）都係大我十年，我心目中嘅忘年戀係相差十五年以上先算係，甚至大到可以做埋對方個女先算係。」
顧美華
「唔接受，始終年齡相若會好啲，大太多好難溝通到！不過有次我着背心去跑步，撞到一個三十幾歲嘅男仔，佢仲同我微笑，我唔想有咩誤會，冇理到佢。」