Baby脫模摘星 飛形象等開竅
Angelababy與杜汶澤對話，笑談愛情觀，Baby對「愛」與「鍾意」分得很鮮明，鍾意一個人是喜歡跟那人相處，愛一個人，則會心甘情願為對方付出！Baby由模特兒成功轉型做演員，入行十多年的阿澤對Baby傾囊相授演戲心得，教她放低形象，不要過分保護自己！
杜：杜汶澤 A：Angelababy
終身偶像張栢芝
杜：你成功由模特兒轉型為演員—一個有價值嘅演員，有冇遇到一啲好難捱嘅過程，例如，畀人話得個靚字但冇腦咁？
A：冇試過，仲有記者曾經同我講話我講嘢好成熟。
杜：聽你講嘢都知你有諗嘢啦！
A：反而喺轉型過程當中，我覺得演技係最難，唔知點樣投入，好似我好難喊出嚟，但又唔係唔投入，我試過拍一場傷心戲，雖然喊唔出，但之後都傷心咗幾日，要去游水先放得低。
杜：依家好多女仔學你咁化妝，以你作為靚嘅標準，喺你心目中邊個最靚？
至今仍有感覺
A：張—栢—芝！我記得我細個嗰陣，見到一張海報入面嘅女仔好靚，我問媽媽係咪張曼玉？媽媽話佢係張栢芝，由嗰陣開始，我就好留意栢芝，《星願》、《喜劇之王》都有睇。
杜：栢芝真係一個天生演員。
A：我對佢個樣仲好有感覺，試過有個日本model同栢芝有少少似樣，我喺日本見到佢會面紅紅，第一次見到栢芝真人，更加唔識講嘢！
杜：你好崇拜佢，唔通你鍾意女人？
A：唔會。
杜：栢芝確實做戲好好！
A：係好吸引，我唔知點先叫做戲叻同唔叻，但佢好吸引我。
杜：喺你眼中最靚嘅女人係栢芝，咁你拍咗咁多部戲，覺得邊位男主角最教到你嘢呢？
A：內地有一位資深演員巍子，佢好大年紀，同佢合作，佢每次講對白，就算係重複嘅對白，都會好吸引我去聽，一啲都唔覺得悶，同佢做對手戲，我仲會好快投入到，覺得佢好勁。
圈中難搵知心友
杜：覺唔覺得圈中好難搵到知心友？
A：我最好嘅朋友都唔係圈中人，可能我對好朋友嘅要求好高，要無論發生乜嘢事，都會瞓身企出嚟幫手，我為咗幫朋友，就算用晒成副身家都冇所謂，成為我嘅好朋友，我會用好多時間去經營呢段友情，依家我有四個好朋友都係圈外人，所以冇時間再去識新朋友。
演得好冇包袱
杜：我覺得你唔係咁容易信人，呢個世界有唔少人鍾意害人，所以保護自己係好正常，但呢樣嘢過火嘅話，會成為演戲障礙，因為你成日唔將自己拎出嚟，會成為習慣，拍戲就好難做得真。
A：我確實遇到呢類問題。
杜：好多藝人都會諗形象緊要定演戲緊要，但好似吳鎮宇、黃秋生咁，佢哋冇形象可言，演戲咪演得好好冇包袱囉，反而啲形象好嘅藝人，有啲演技好差！所以，要拍戲好最緊要係將自己嘅形象放低，否則，用乜嘢方法都係唔work，希望Baby你好好參考啦！多謝你今次做我嘉賓，下次我會訪問你同門師姐熊黛林。
一切由旗袍開始
杜：我同你應該係拍《破事兒》認識，導演彭浩翔想搵個新人拍一個童話故事，佢話要着旗袍校服好睇嘅，咁我即刻諗起芭比，一諗起芭比，就想起Baby！當時你同Janice Man（文詠珊）喺網上都好紅，日日都有好多人睇你哋個Blog，我一睇覺得：「嘩，搵到喇！」
A：我要澄清我冇放啲性感相上去架，你嘅眼神好似我放咗啲好性感嘅相上去。
杜：當時我見你同JM，之後只係同你合作到，而JM最後因為種種原因冇合作到。係喎，你哋嗰時都好friend喎！
A：依家都係朋友。
杜：女仔好易為啲小事嗌交，仲會互相比較喎！
JM靚女做朋友
A：係，但我同JM都唔係嗰種人，我哋起初係朋友嘅朋友，之後佢喺我個Blog留言，我覺得佢好靚，想同佢做朋友，因為我鍾意同靚女做朋友。
杜：女仔多數鍾意同啲唔係咁靚嘅女仔做朋友架喎。
A：我一半男仔一半女仔性格嘛，幾直嚟直去，啱玩就玩，唔啱玩就唔玩。
杜：你拍《破事兒》嘅時候，有冇咩事好記得？
A：試身嘅時候條旗袍本來好闊，之後愈改愈窄，到拍嘅時候一坐低差啲抖唔到氣。
杜：呢啲咪導演做嘅好事囉，佢去搞藝術，就搵我做行政嘢、做衰人，成日問我條旗袍可唔可以窄啲，個衩可唔可以高啲，到最後連美指都話，喂，監製底褲都見埋喎。嗰時你究竟知唔知自己做乜？
A：真係唔知，收到話好似拍MV咁，冇劇本嘅，去到現場只係叫我做一個好愛關智斌嘅女仔，記得第一日就要錫佢。
傻更更到愛拍戲
杜：拍完《破》片之後，好似都拍咗唔少戲，其中同王祖藍合作嘅《矮仔多情》，你覺得佢點？我覺得佢成日扮豬食老虎，起初仲以為佢鍾意麻甩佬，之後先發現佢好鍾意女人。
Ａ：我睇得出佢鍾意女人，因為我有睇八卦雜誌，哈哈！我幾鍾意佢，因為覺得佢幾搞笑，我鍾意同啲搞笑嘅人做朋友。
杜：會唔會搵搞笑嘅人做男友，唔搞笑嘅唔合格？
Ａ：鍾意嘅人同搵男朋友應該分開，男友唔係鍾意，係愛至得。
杜：愛同鍾意有乜嘢分別呢？
Ａ：鍾意嘅定義係喜歡同佢相處、共事，愛就係心甘情願為對方付出所有。
杜：真係分得好清楚，我老婆同你合作過《花田囍事》，佢讚你掂，話你做得最好，我都認同你做得搞笑過吳君如，佢用番自己好出力嘅搞笑本領，但你就乜都唔知，好自然咁搞笑。
Ａ：我真係乜都唔知，食飯食到成口都係，當時太趕，唔可以睇番錄影，好多都係一take過，當時都唔知自己做成點。
杜：之後你拍《全城熱戀熱辣辣》，你點識導演夏永康架？
夏永康係恩師
Ａ：佢都算我恩師，我第一個大廣告都係佢拍，呢套戲令我開始想做演員，因為覺得好好玩，可以做第二個人，雖然拍咗一星期，但嗰個星期我只係諗住拍戲。
杜：投入咗拍戲就乜都唔會理，我拍戲都係天王都冇面畀，全情投入，我識好多好戲之人都係一樣，一拍戲只顧住演戲。
Ａ：拍《全》片嘅時候我要拍一場喊戲，但我好難喊，因為我好樂天，不過，最近拍部戲，磨練到可以易啲喊出嚟。
杜：你記唔記得最近一次喊係幾時？
Ａ：唔記得，只知自己啲情緒好直接，會嬲到喊，但喊完就冇嘢，凍到喊、傷心到喊都試過，嗰次凍到喊我都唔想，只係凍到眼淚自己流出來。
杜：有冇因為聽到一啲難聽嘅說話而喊？
Ａ：以前試過依家唔會，睇到網上留言又或者初初畀人話整容，都會好唔開心、會喊，依家冇嘢，始終係好耐以前嘅事。
衫：b+ab x angelababy
髮型：CARR CHENG@P.O.P HAIRDRESSING
場地：金牌小龍＠皇室堡