陳嘉桓陰險 阿佘被咀
國際著名眼鏡設計師Alain Miklitarian素來「熱情」，前晚出席品牌活動時照舊發揮「貪玩」本色，手多多「招呼」陳嘉桓（Rose），又對佘詩曼施展擒拿手、搭香肩兼送吻，阿佘因來不及反應窒了一窒，而Rose也笑言被突襲後下意識縮開。
阿佘前晚以貴賓身份出席國際時尚眼鏡品牌alain mikli派對，品牌設計師Mr. Alain Miklitarian亦重臨香江，他在台上不時整蠱嘉賓。
「有人提醒小心」
在大合照時，他突然手多多「掃」Rose的短褲邊，登時出現疑似「撩陰爪」，嚇得Rose即時縮開，事後Rose被問及對方的「熱情」舉動時？她說：「我上台之前已經有人提點我，話佢個人好貪玩，叫我小心啲，影合照時，我感覺到佢隻手輕輕掂到我褲邊，我本能即時縮一縮，佢見我縮都有即刻sorry。（會唔會介意佢嘅熱情舉動？）我諗外國人係比較熱情啲，但我以後都會小心啲！」
「佢都冇做乜嘢」
至於阿佘亦不能幸免，被對方例牌搭香肩之餘，更趁她不為意錫了她臉頰一啖，阿佘登時窒了一窒，其後她受訪時落落大方的說：「熱情？都係，外國人係咁。（唔介意？）佢都冇做乜嘢，只係表現friendly，感覺都好開心。（但你窒咗一窒喎。）係冇諗過，加上對鞋好高。」
6月底阿佘將返無綫拍戚其義新劇《Fall in Love》，與陳豪、葉翠翠等合作。對於她主演的劇集《花花世界花家姐》結局，阿佘不會相約同劇演員一起看結局，林峯都要開工，不過她充滿信心。
而李璨琛擔任壓軸模特兒，自電視劇《怒火街頭》播出後他多了一班主婦fans，感覺很親切與開心，現時他最想演反派：「以我副尊容應該好有新鮮感。」問到與謝霆鋒是否分屬老友？他立刻岔開話題說：「唔好講咁多啦！」
文：名人組