劉美君尋樂趣翻唱男人歌
劉美君（Prudence）即將推出國語發燒「Love Addict」專輯，翻唱十首耳熟能詳的男歌手經典國語金曲，無懼舊歌先入為主，劉美君勢要唱出自我風格：「咁多嘢驚，人生仲邊有樂趣！」
決定推出翻唱國語歌的劉美君，如大碟主題「Love Addict」一樣，情歌讓人聽到上癮，加入自我風格挑戰一眾男歌手的經典冧歌，她笑言：「以前唱K想唱佢哋啲歌，都要轉Key，依家我唱咗，咪方便啲女士唱K囉！」
洗王傑唱腔
至於翻唱歌最大難度是被先入為主，劉美君不諱言：「驚得咁多，世界好多嘢咪唔使做，又驚自己唱得唔好，咁人生冇樂趣嘞。」翻唱的作品中，她承認當中李泉的《走鋼索的人》頗難唱，她說：「首歌好難唱，個Range好大，由最低粒音同最高粒差別好大，我都怕處理唔到，但最奇係入到錄音室又好快錄起，亦係唱得最好一首。」
反而王傑的《一場遊戲一場夢》是最痛苦，痛苦不是因高難度，而是王傑影子實在太深，要把他的聲線和唱腔洗掉。另外，庾澄慶（哈林）的《老實情歌》，哈林的演繹令她一聽便愛上了。
最愛新嘗試的劉美君，就連唱片封套相亦大膽起用杜汶澤來操刀，原來劉美君是阿澤年少時頭號偶像，喜歡影相的阿澤不時將相放上微博，劉美君謂：「有朝早我練瑜伽時又睇到佢啲相，咪問下佢想唔想幫我影相，佢即刻話『好好好』，我唔知佢影成點，但如果一個人咁鍾意妳，佢實有份熱情嚟影妳嘅。（超水準？）影相最緊要捕捉到嗰剎那感覺，佢就做到，我夠膽講張相係人見人愛，好靚好有感覺，朋友睇過都Like到飛起。」
入行25周年
原來今年12月23日是劉美君入行25周年，她謂12月23日是當年她推出第一張唱片的日子，當年她創下逾50萬銷量的輝煌成績，她這個新人王紀錄至今都未有人打破。
文：音樂組
攝：吳文聰
Hair：GarySun＠LeSalon
Makeup：Kris Wong
Venue：Harbour Club Lounge＠都會海逸酒店
Wardrbe：Drex Fable
Styling：Queenie Yu