霆鋒召律師獻策母子齊發功
「鋒芝危情」決裂升級！據知，謝霆鋒終於出招向張栢芝還以顏色，日前秘密急召律師飛吉隆坡諮詢法律意見，詳細理解離婚的得失，媽咪狄波拉則在港搜集資料，嚴防有人傷害兩個寶貝孫仔Lucas和Quintus，兩母子聯手增加爭撫養權的勝算。
自鋒芝驚爆婚變後，霆鋒一直封嘴專心工作，在吉隆坡埋頭苦幹為電影《逆戰》拍宣傳片，而栢芝在深圳拍完《影子愛人》返港後，至今依然潛水不見蹤影，記者在陽明山莊守候多日，完全不見栢芝和一對兒子行蹤。惟事情始終要解決，尤其兩人還育有一對年幼的兒子，拖下去對一家四口都沒好處。
好友睇淡：始終會離
據霆鋒身邊密友透露，之前玩大了用短訊向霆鋒提出「我要離婚」的栢芝，儘管已後悔莫及，可惜一切都為時已晚，霆鋒對栢芝已徹底失望心死，離婚態度依然堅決。
消息指由於霆鋒之前心軟，不停將物業轉名給栢芝作出安撫，名下5億身家日漸被陰乾，為了自己和兩名兒子的將來，企硬要離婚的霆鋒，日前急召他的律師飛去吉隆坡見面，親自向律師諮詢法律意見，詳細了解離婚的得失、身家分配和撫養權問題，據霆鋒密友說：「阿仔對栢芝好失望，覺得栢芝太任性、偏激，佢堅決要離婚，依家栢芝諗計希望用兩個仔氹番霆鋒，不過就算霆鋒今次心軟唔離婚，將來佢都一定會同栢芝離婚。」
至於心痛兒子受到傷害的拉姑，雖然有指她借好友查小欣之口篤爆家事，惟事發後拉姑一直封嘴，在背後默默地保護霆鋒。據知，心思縝密的拉姑為保護兒孫，親自出馬向多人搜集資料，據知情人士透露：「有人話畀拉姑知，某人已經唔止一次同霆鋒和友人講：『如果老公唔要我，喺ifc地下見啦！』拉姑好驚有人會傷害兩個乖孫，不停追查真相，如果將來鋒芝真係離婚，希望霆鋒可以攞番兩子撫養權。」
7月回港公開露面
至於身在吉隆坡拍《逆戰》的霆鋒，將於26日飛北京出席《財神客棧》宣傳。而《逆戰》本於7月初煞科，惟因進度影響，要延遲數天才埋尾，霆鋒返港後要拍手錶廣告，7月19日則出席趙曾學韞善學基金活動，自婚變後首次在港公開露面。
此外，有傳鍾欣桐（阿嬌）是鋒芝的第三者，兩人拍《浣花洗劍錄》後成為好友，令栢芝打爛醋罈，促使栢芝出手接掌霆鋒財政大權。
文：音樂組