「濕身徐子淇」寫真賣$1,600吸潮客

「濕身徐子淇」余曉彤（Hidy）揚言推出「貴絕o靚模」寫真！售價千六蚊的寫真食住潮流送平板電腦，問到會否擔心賣唔去？她信心爆棚說：「我賣一本等如人哋賣十本啦！」

寫真戰尚未爆發，周秀娜師妹、「濕身徐子淇」Hidy先出口術助聲威，她透露寫真將有普通版及「終極豪華版」，前者售價$128，「終極豪華版」售價則高達$1,600，附送$1,500的平板電腦及價值$200的特製保護貼。計落豪華版比普通版足足貴12.5倍，亦是o靚模寫真中最昂貴的一本。

Jeana寫真以「血管胸」做賣點。

大口氣寸Jeana

問到會否擔心銷量？Hidy說：「唔會咁諗，平板電腦係潮流，冇寫真試過咁推出，我賣一本等如人哋賣十本啦，我重質唔重量。（好揼本？）都有好多Sponsor，平板電腦係廠商為我度身訂造。」Hidy的寫真在天靈島取景，除例牌晒事業線外，更會玩濕身及化妝技巧！

Hidy同門「嫩版范冰冰」何佩瑜（Jeana）亦將於今年出寫真，以複製師姐娜姐之路及騷「血管胸」為噱頭，寫真售價$128。寫真豪過對方多多聲的Hidy非常大口氣：「送本畀Jeana冇所謂，我驚佢倒送十本畀我冇位攝。」Jeana對於Hidy回應句句有骨：「多謝佢，不過如果要送十本畀佢就冇嘞，自己都驚唔夠，依家設計同印刷外，仲擔心物流，驚補唔切貨。」

33Ｃ趙哲妤的寫真將於中港澳三地取景。

Hidy露事業線外，還會大玩濕身。

趙哲妤或半裸

另外，「中國小姐」趙哲妤（Uny）亦將出寫真騷33Ｃ上圍，下月初將到香港、澳門、內地三地拍攝，她表示尺度是三點不露：「全裸未必，但如果有需要半裸都唔介意。我會玩人體彩繪，行High Fashion同高檔形象，會以乳貼上陣。」身為大學生的Uny強調自己學歷高，不屑與泳衣o靚模比較：「成日都泳衣同內衣太濫嘞，如果啲人買寫真係為咗睇泳衣好無知囉，不如去沙灘睇。」