杜麗莎阿叻多聲道jam歌
杜麗莎與陳百祥（阿叻）昨日在電視廣播城綵排，二人分別用西班牙文、菲律賓文及日文jam歌，身為「老師級」的杜麗莎更讚阿叻勤力兼唱得。她說：「我尋晚先喺多倫多返嚟，今次係阿叻專誠邀請我回來，（佢唱成點？）not too bad，佢好勤力，今朝又嚟練習，秀姑都好犀利，喺後面提佢啲字。」
對於前助手向她追討拖欠薪金一事，杜麗莎表示暫時不知情況，要月底才會上庭，她又謂自己視對方為「細佬」，故感到很失望，對她來說是大打擊。問她有否傾庭外和解？她說：「之前我打畀佢，佢收我線，佢都出嚟講咗好多嘢，我都想佢好，佢要錢咪畀佢囉！不過其實好多嘢係唔應該講出嚟，佢過咗條界，如果係朋友，有乜嘢佢可以打畀我同我講，唔係要全世界都知。」