趙碩之四處辣火頭犯眾憎

Wylie每次接拍電影及電視劇總鬧出是非，正拍攝亞視劇集《親密損友》的Wylie，有傳她不但愛點演員企位，還教戲中的前夫Kelvin做戲，令部分工作人員看不過眼，開口叫Kelvin不用理她。Wylie知衰得知自己不受歡迎，EQ極高的她即玩撒嬌，私下相約亞視執行董事盛品儒力數演員不是，搞到多位演員遭高層「照肺」，最終辣慶一眾演員齊齊杯葛她。

公然講波踩戴夢夢

據聞，信心爆棚的Wylie更眾目睽睽下高談闊論力證自己是「真波」，甚至在眾演員面前嘲笑前歌手、現任經理人戴夢夢恨出碟恨到發燒：「佢根本唔甘心做幕後！」

演員之一的呂晶晶承認Wylie有教她企位，並暗寸對方扮導演，晶晶說：「我哋係有商有量。（咁你有冇教佢企位？）冇，呢啲係導演做o架嘛。」趙彤初時堅決否認「杯葛」傳聞，但之後轉口風說：「唔知喎，佢同關楚耀有好多戲，唔知喺男家嗰邊有冇被杯葛。」還自爆遭對方取笑講廣東話不正。

關楚耀唔覺玩杯葛

Kelvin被問到遭Wylie「教戲」？他說：「唔覺。（佢畀人杯葛？）feel唔到。」由於Wylie身在美國登台未聯絡得上，反而經理人戴夢夢接受長途電話訪問說：「做乜傳啲咁嘅嘢？我唔信佢咁講。」對於被指恨出碟，原本力撐Wylie的夢夢就大方說：「唔緊要，人有人講。」

文：音樂組