深藏恐怖分子 Alice B.最懼心魔

「恐怖大亨」拉登已死，消息令美國舉國歡騰，不過對港人來說，可能不當一回事，其實人人心中各有不同「恐怖分子」，袁詠儀竟然推舉老公張智霖做新任恐怖分子，原因是他不夠恐怖，認真無厘頭！而Alice B.覺得最恐怖是內心的魔鬼。

最恐怖係人心裏面嘅邪惡念頭，我覺得每個人心裏面都有一隻魔鬼，睇魔鬼幾時走出嚟，其實每個人都有能力做一啲好恐怖嘅嘢去破壞世界。

最恐怖嘅人一定係方大同，因為佢唔係人係外星人，成日當studio係山窿，匿埋唔出嚟，好恐怖。不過都想佢繼續匿埋喺山窿，創作出更好嘅音樂畀大家。

我覺得最恐怖係白蟻，因為我曾經畀白蟻蛀爛咗個衣櫃。我最鍾意買衫，屋企有個大衣櫃，我向來好小心保存啲衫，但係點知有次畀白蟻蛀爛衣櫃，真係好可怕，最後要買個新衣櫃，仲要執衫，搞咗好耐真係好麻煩。

世界上最恐怖嘅係霸道女人，我唔講得係邊個，總之曾經畀個霸道嘅女人蝦，樣樣食住我。（希望佢消失？）唔使，希望佢可以改過自新。

我覺得新恐怖人物係張智霖，因為佢都唔會恐怖得去邊，所以畀佢試吓做恐怖分子過吓癮啦！

我覺得最恐怖嘅人就係拐子佬，專捉小朋友嘅壞人，仲要整傷佢哋，點可以咁樣對小朋友？所以覺得佢哋好恐怖。

我最怕黑巫術，好驚鬼怪，所以有關鬼怪嘅戲我從來唔會睇，熟悉我嘅朋友都唔會同我講鬼故事，因為佢哋知我怕，每次睇完鬼戲或者聽完鬼故事，我都會形住形住，個心都會好唔安樂，要過一排先會平復。

最驚人睇我跳舞或者叫我跳舞，我係個舞癡（跳舞白癡），肌肉唔柔軟，郁都郁唔到，好似機械人咁，好肉酸。我由細到大都冇跳舞天分，學過芭蕾舞，初班已經要留班，所以從此冇學。