周永恒睇樓遷居避是非
創作歌手周永恒（Roy）早前因與業主發生糾紛，日前一家三口齊出動另覓安樂窩，主打交通方便，兼有優良學校網的紅磡區，睇樓之餘，又提早慶祝母親節共享天倫，送花冧得老婆趙頌茹眼濕濕。
Roy年前曾誤入歧途染上不良嗜好，但自從和趙頌茹（阿Yu）結婚誕下女兒周信希後，已愈來愈生性，可是上月他再惹是非和現居的業主發生糾紛，沉住氣的他為免家無寧日，遂打算搬屋離開是非地。
主打細唐樓
日前Roy抱住囡囡，拖實阿Yu到紅磡區睇樓，主打面積較細的唐樓，他先睇鄰近殯儀館、約價一百九十萬、約三百五十呎的單位；之後又到隔幾條街，面積為四百呎，價值二百五十萬的寓所。
小夫妻睇樓期間，興奮得手舞足蹈，不時問只得七個月大的囡囡可喜歡新居，又向經紀查詢附近的學校網資料，雖然阿Yu頗喜歡之前有露台的較細單位，但Roy就嫌空間不夠女兒活動，一切以方便女兒日後返學為大前提，兩人商量後向經紀表示回家「開會」才作決定。
狂搵錢養家
今年是阿Yu第一年慶祝母親節，為表心意，Roy送上花及薰衣草盆栽，氹得阿Yu眼濕濕要攬實老公致謝，之後又代囡囡送糖，阿Yu隨即肉緊地咀了信希一吻，兩人行到攰就到茶餐廳歎茶，見阿Yu飲由Roy遞上的凍飲時，再次流露出冧樣。
Roy離開餐廳時表示：「我搬屋都係為老婆同個女，依家啲樓好貴，真係要努力啲搵錢。」他讚老婆易氹，平價母親節禮物已令她很滿足，不過阿Yu卻說希望明年可收到鑽石。
採訪：音樂組