江若琳北京發圍仔照溝
江若琳（Elanne）昨日在北京舉行「處女」國語碟發布會，為慶祝夢想實現，Elanne大晒凌空一字馬等高難度舞姿，而唱片公司更送一張巨型機票給她，寓意Elanne從此飛越國際！另外，她又直言不排除在北京結識男友。
Elanne昨日假北京舉行首張國語唱片發布會，首次在內地推出唱片就吸引了大批歌迷及過百傳媒採訪，唱片公司為隆重其事，特別安排內地人氣網站全程直播整個發布會的過程，讓未能親身到達現場的歌迷們同步支持Elanne。而發布會前一晚，Elanne更緊張得失眠，在開場前不斷做push up等動作來熱身，keep住最佳狀態示人。
實現夢想開心
而發布會甫開始，身穿露腰窩釘衫的Elanne跟一班舞蹈員大跳大唱主打歌《唯有愛》，做出凌空一字馬等動作，看得台下尖叫聲四起，其後Elanne又換上一條春裝吊帶裙唱出兩首最新情歌。事後Elanne興奮表示：「每年嘅一月對自己嚟講都好特別，上年1月15日可以開到個人演唱會，實現咗願望，咁今日1月5日又可以實現埋出國語碟呢個夢想，所以真係好開心！」
獲贈巨型機票
最後，唱片公司高層向Elanne送上一張巨型機票，寓意她從此能飛越國際，Elanne即時許下承諾：「我以後一定會更加畀心機唱歌，唔會令支持我嘅人失望。」目前要長時間留在北京工作的Elanne，被問到有否打算在當地結識男友？她笑說：「如果真係搵到個啱嘅人都會嘅！其實依家對我嚟講事業先係最重要，拍唔拍拖就隨緣啦！」