Kay行得正拒驗下巴
謝安琪（Kay）昨日出席公開活動，對於再被傳媒指她到韓國整容，Kay坦言習慣被負面新聞打擊，但無意倣效Angelababy搵醫生驗面證清白，她說：「我行得正，唔需要去驗！」
Kay昨日以大使身份宣傳「思覺失調關愛日2010」，對於再次被傳出她到韓國整容的消息，Kay坦言每次只要工作上有好成績的時候，總會有負面報道隨之而來，刻意打垮她的事業，她說：「好似釜山電影節咁，難得香港兩位新進導演有好成績，點知返嚟個焦點畀人轉移咗，話我去整下巴，與其大家去討論個下巴，不如留意一下個電影節啦，咁樣真係好膚淺、好可笑！」
曾患思覺失調
Kay坦言難以控制負面新聞，只希望努力做好自己，好好報答支持她的人，當追問到底有否整容？她說：「梗係冇，（你嘅相前後有出入？）我影你都影得到呀！（考慮跟Angelababy一樣搵醫生驗面？）唔想討論呢個問題，呢啲係炒作新聞，我覺得冇呢個需要，行得正，就唔需要去驗！」
Kay透露以前曾經因為負面新聞的壓力而不幸患上思覺失調，出現幻聽、作嘔及抑鬱症狀，服藥半年後才完全康復，學會以積極心態去面對生活。同樣是大使的陳奕迅因工作在身未有出席，但預先拍攝短片支持。而老公張繼聰昨晚七時許，透過微博寫了三篇文章，為老婆Kay平反，最後更寫「我為我的太太感到光榮」，大晒恩愛！
台灣開工當度假
此外，Kay月底將推出首張華語大碟《第二個家》，日前專程到台灣宜蘭拍攝新歌《脆弱》MV，Kay片中飾演神經錯亂，為令角色更「到肉」，她加入很多小動作，獲導演大為欣賞！Kay笑言今次拍MV猶如度假：「喺外地可以減低好多紛擾，令我可以好專心咁錄歌。」
採訪：音樂組