林峯靚仔有錢 黃宗澤爭女認輸

演大奸角的Bosco表示會在劇中害林峯全家兼爭女，他笑言現實中未試過爭女。Bosco謂：「如果對方係林峯我即刻掉頭走啦！佢有家底又靚仔，除非個女仔鍾意啲妖艷就會揀我。」去年拍此劇時傳他與Toby戲假情真，最終要與女友胡杏兒到沖繩旅行箍煲。問到再跟Toby宣傳會否惹怒杏兒，Bosco笑說：「啲緋聞係宣傳啫，得啖笑。」

Toby煲湯益大家

Bosco與Toby一起宣傳及合照亦未見尷尬，他謂：「拍每套劇都會傳一次，下次可能傳不和。」Toby自爆拍攝時常煲湯給其他演員喝，尤其照顧當時準備開演唱會的林峯，並說：「點解唔傳我同林峯呢？」

甚少緋聞的林峯，對Bosco「認輸」言論大表無奈：「唔係嘛，我足不出戶喎！其實大家唔同類型，Bosco好妖艷，正一姣婆四。（有冇試過爭女？）冇。（係咪唔使爭？）我都想揀到最終嗰個。」

另外，之前有傳葉童與劉松仁不和，兩人碰面時亦未見尷尬。葉童大讚劉松仁像哥哥般照顧大家，但她性格反叛不愛被照顧，有時會黑面而產生誤會。昨日與劉松仁再遇，有小別勝新婚的感覺。

黃宗澤與Toby曾傳緋聞，合照時絕無尷尬。

葉童與劉松仁言談甚歡。