張智霖負傷賑災教好囝囝
早前因鼻骨移位，做完手術不久的張智霖（Chilam），懶理未完全康復，明天將會在傷患後首度重踏舞台，參與在紅館舉行的賑災騷，希望為乖仔樹立好榜樣。
演藝界連日來密鑼緊鼓籌備明天於紅館舉行的《演藝界情繫玉樹關愛行動大匯演》，做完鼻骨手術不久的Chilam亦將參與演出。Chilam坦言手術後令他體會到生命的寶貴，他說：「做完鼻骨手術後，個鼻要塞大量棉花，食嘢同呼吸都有困難，掂吓鼻骨都痛，令我更加明白生命可貴，（對唱歌有冇影響？）影響我唱歌愈來愈好囉，其實再等多一個禮拜，我就完全康復。（教魔童做善事？）我一向都以身作則教佢，之前捐咗錢，依家就出力。我覺得呼籲捐錢嘅演出，最重要係持之以恒，唔好捐完就算，因為依家唔係博見報，而係真正想關心災民需要。」
偉仔嘉玲未能出席
而Chilam老婆袁詠儀亦表示想參與這次演出，她說：「我仲未接到大會通知，不過要我做乜都冇所謂。其實地震後都有團體搵過我同Chilam去探訪，但我怕有高山症，要人反過嚟照顧就唔係咁好，所以推咗。」
另外，有傳梁朝偉會與劉嘉玲出席大匯演，但偉仔所屬的澤東表示，偉仔正身在內地拍攝《一代宗師》，應該不能趕及返港出席，但他與嘉玲已第一時間捐錢，但有關方面拒絕透露金額。
毛阿敏捐款一百萬
至於大匯演內地召集人孫楠，則請來久未露面的毛阿敏參與錄音，毛更捐款一百萬人民幣，她說：「捐款只是心意，該做就做。」而陳小春日前以五、六千元向連凱買畫，款項會捐予青海賑災。
此外，香港戲院商會昨日宣布，會將二十六日及二十七日兩天售出之各場戲票，每票捐出一元予香港紅十字會作賑災之用。
文：影視組