洪卓立充雪糕仔派冰淇淋

洪卓立（Ken）為慶祝新碟有金唱片銷量，昨日化身雪糕仔，花五位數字租雪糕車，在旺角街頭向歌迷大派他親自「唧」的白滑軟雪糕，數十歌迷撐場，近百人圍觀，令現場水洩不通，問他何不似性感女星食雪糕般以火辣造型出現？他靦覥說：「食雪糕啫，唔使sexy，我冇嘢可露，最多除埋出面件衫。」

他自爆多了「同居女友」，她是三個月大的玩具貴婦狗，首次養細狗的他笑說：「諗住借佢識女仔。」可惜如意算盤未打響時，狗女已令Ken頭痛不已，因為小狗不滿被困在籠裏而狂吠，令他心痛兼夜夜難眠。由於寵物店職員指小狗抵抗力弱易生病，不能抱狗上床瞓，為免再失眠，他或考慮將狗籠搬近梳化，他瞓梳化相陪。