周麗淇（Niki）每年十一月都大搞「周氏宗親團」，一行十數人浩浩蕩蕩飛返家鄉上海，探親之餘亦狂食特產大閘蟹，Niki不諱言愛回鄉並非全為食，主要是陪她最錫的外公、外婆度假，以盡孝心。
Niki每年年底必定向公司請假返家鄉上海三、四日探親，她說：「我喺香港出生，但因為自小跟外公、外婆住，感情特別好，知道阿公、阿婆好鍾意回鄉，所以我同家姐（周汶錡）工作有幾忙，都會抽幾日陪老人家返去。」除有周氏兩姊妹做「領隊」外，Niki的父母、親友都會同行，故Niki形容每次返家鄉都十分大陣仗，她謂：「啲人成日覺得返家鄉好悶、好老土，但我就好鍾意、好珍惜，因為只有呢個Trip，我哋一家先可以咁齊人，我哋姓周嘅，家庭觀念好重。」
鯨吞生煎包
Niki揀十一月返上海，坦承和上海的大閘蟹當造有關：「我哋周氏宗親最大嘅『集體娛樂』梗係圍埋食大閘蟹啦，我哋上年仲專登去陽澄湖揀至靚嘅蟹，隻隻都斤両十足㗎。」不過，原來Niki醉翁之意不在蟹，而是伴蟹的蟹醋，她更自稱是「醋癡」，她笑說：「我其實唔係最鍾意食蟹，鍾意啲蟹醋多啲，我可以齋飲醋。」除食大閘蟹外，Niki又會專程到上海的大街小巷鯨吞地道生煎包，她口水流說：「啲包熱辣辣，一擺落口咬落去，啲肉汁成口都係，好正呀。」
知名度日增
Niki自返大陸拍劇後，知名度日增，去年她更「寓娛樂於工作」，順道應上海潮流雜誌的邀請拍照，她指大陸的工作模式和香港很不同：「原來佢哋好專業，我去影時裝相，會供應埋自助餐，啲衫全部都襯好晒，唔似香港咁要『執生』。」
文：音樂組