鄭嘉穎與佘詩曼（阿佘）等出席祝捷會，由於劇集收視理想帶挈他們搵真銀機會，阿佘坦言多了工作，更指聖誕、新年黃金檔期因趕拍兩劇，預計損失七位數字。至於嘉穎表示曾去拜四面佛，但一定不是報道所指為「求獎」。
阿佘、鄭嘉穎、陳豪、關菊英等一班《宮心計》演員前晚出席祝捷晚宴，曾勵珍、陳志雲亦有到場。說到收視好令劇中不少藝人都被「翻舊帳」，阿佘表示冇有怕：「都冇乜嘢畀人揭，咪港姐底囉！都冇乜秘密，緋聞、關係圖都寫得太多啦！」她又謂近日增加不少工作，遲些聖誕及新年檔期，因趕拍兩套劇，度期有困難，更謂：「估計會損失七位數字，不過唔可惜，錢係搵唔晒嘅，只要開心就得，唔拍劇又冇呢啲收成啫！」
唔想知未來
說到有報道指鄭嘉穎去泰國拜四面佛，為奪獎兼一掃霉氣，阿佘力撐對方「有米」：「得㗎咩？都唔知點解啲人成日咁講，（想唔想佢攞獎？）邊個攞都開心，（咁嘉穎迷唔迷信？）唔知喎！都係祈福求平安啫！我以前都有拜，但唔會問卜，因為唔想知將來。」
封祥仔視帝
另外，嘉穎承認曾去泰國拜四面佛，這個習慣已維持兩年，他說：「十一月九日係四面佛誕，拉姑又畀到飛我，所以我喺馬來西亞做完嘢咪直接一個人飛過去。（求乜？）唔講得，講咗唔靈，但一定唔係求獎。」有指他望掃走霉氣，他笑道：「煤氣公司咩！我屋企用石油氣，（阿佘撐你唔霉？）係咩！寫吓寫吓咪唔霉囉！（獎項上係咪都打定輸數？）我都想祥仔攞，心服口服，佢係我心目中視帝。」
文：影視組