視帝大熱黎耀祥昨日出席活動時，對於能否攞獎表示順其自然，最希望《巾幗梟雄》奪得最佳劇集，提到拍檔鄧萃雯日前以低胸裝亮相台慶記者會，祥仔笑說：「係啦，我睇到都有啲唔慣，少見『四奶奶』咁sexy。佢叫我嗰晚執正啲？我哋呢啲係實力派，專登整歪自己嚟襯托佢，佢係偶像派。（你會着咩衫出席？）可能着番上年嗰套衫，因為上年攞男配角獎。」另外，對facebook上有過萬人支持「柴九」奪獎，祥仔開心多謝大家支持。
祥仔又透露明年三月將開拍《巾幗梟雄2》，並會努力減十磅迎合：「叫佢（雯女）小心啲，到時我分分鐘瘦過佢。（叫雯女瘦邊度？）心口唔可以瘦，要keep住，我同佢都係頭大，首要減面。」而另一視帝候選人鄭嘉穎日前到馬來西亞宣傳時，笑言對黎耀祥奪「視帝」有信心，而問到他會否與緋聞女友佘詩曼同登視后視帝寶座？他「撒嬌」說：「哎呀，點解唔聽人講嘢，都話睇好祥仔攞視帝。」