林海峰前晚為七場的「是但噏我願意」Talkshow揭序幕，今次以結婚做主題，乘勢寸盡天王天后「瞞婚事件」，大玩粗口諧音字自嘲「正能樣」，連同嘉賓葛民輝和性感「晒罅」謝安琪（Kay）為新人主持婚禮最終「爆紅」收場。
林海峰（阿Jan）前晚首場開騷，太太彭羚、草蜢、周麗淇以及林家上下齊來捧場，今次以婚禮為主題，阿Jan乘機搬天王天后「瞞婚事件」上枱，笑指楊千嬅「惡啃」，以「扭傷頸」招數贏得丁子高陪她走下半世，又指黎明和樂基兒，一個講外星話、一個講地球話，溝通似第三類接觸。阿Jan又將婚宴中新郎新娘及兄弟姊妹團所做的事借題發放笑彈，指新郎婚前是「ＢＢ豬」，婚後即被叫「死嘢」，所以婚宴是「ＢＢ豬」出殯日。
粗口諧音令人捧腹
阿Jan台上大玩粗口諧音字，說現今社會充斥負能量，有「負字頭四大天王」包括「負面華」、「掃興城」、「冷水明」和「淡友張」。更抵死將「Deep-V」圖案來形容是女性成功的事業線，「微波形」則是初萌芽的事業線，有人會用手創造「逼出」事業。之後講解Bra動作似「英雄本色」的周潤發亂搶掃射「啪啪聲」，連串有味笑話令觀眾捧腹大笑。
Talkshow尾聲為進行「神級婚禮」，阿Jan坐上巨型鑽石戒指唱《小玩意》空降舞台，阿葛扮教宗、阿Kay更性感低胸「露罅」變「安琪公主」，阿Kay更不避嫌唱緋聞好友陳奕迅熱歌《超人的主題曲》，阿葛向新娘子唱「寂寞奶奶」十分爆笑。
難啃都可以係好嘢
完騷後阿Jan自爆不慎將咪撞向阿Kay令她嘴角「見紅」，累她與張繼聰短期內不能親近。問到是否被彭羚叫「死嘢」？阿Jan謂：「正所謂七分真實三分幻想。」玩粗口諧音？阿Jan笑言：「好Danger㗎，表演係踩鋼線咁。」講「瞞婚事件」可知會當事人？阿Jan笑道：「冇喎，我都係睇佢哋啲訪問，千嬅好難啃係佢老竇講嘅，正所謂『吃得楊千嬅方為人上人』，咁『啃』字都可以係好嘢。」
文：音樂組