七小福活於成年人的世界，師傅、師母、師叔固然日夜接觸；去歌舞廳、荔園表演時，大部分觀眾都是大人；所結識的官商老闆亦是大人，成年人不受管束、吃喝玩樂的生活方式，令七小福無限憧憬，結果未大先壞，偷食香煙，學追女仔。

成龍偷煙‧硬食死貓

在中國戲劇學院學藝，不消半個月，七歲小孩都變老人精，學足梁醒波那兩句名曲：「擔番口大雪茄，充生晒認經理」，當年洪金寶、成龍、元華等頑童看見師母飯後一支煙，也不管危害健康，叼一口煙要緊，成龍就因曾偷偷吸煙，慘被于師傅打得皮開肉綻，但原來這次偷煙仔，他卻是啃死貓。

成龍憶述道：「人人都偷枱頭煙，師傅梗係發覺啦！我就醒喇，去師母房偷，一定神不知鬼不覺。之後師傅發現有人偷煙食，一個一個輪流打，每個打十下，實行大逼供，元武好冇義氣爆咗我出嚟，師傅就問我邊隻手偷邊隻手食，又話我枱上煙都偷，我先知道原來師傅講嘅係洪金寶偷嗰幾支煙仔，唔係講師母嗰包，咁就食咗死貓。」

一支煙仔令七小福惹來不少麻煩，為免師傅發現，曾鬧出不少事端，元秋說：「有次幾個師兄弟食煙仔，師傅突然殺到，無計可施之下惟有將支煙擺落櫃桶，搞到連個櫃桶都燒着埋。」儘管如此，這班反斗星還是執迷不悔，打不還手，煙亦照抽，元華說：「我細細個已經偷煙食，搞到經常畀師傅打，但我照食呀，心諗我都就嚟滿師，你都冇幾年打啦！」

人細鬼大‧偷舞孃

踏入青春期，七小福不免心思思有件事，不論想證明自己是大人，還是確實情苗初長成，也渴望一嘗戀愛滋味，元秋說：「喺學校朝夕共處，好多對都有好感，不過大家實在太驚師傅，所以咪唔敢拍拖囉，何況晚晚喺荔園做到咁夜都冇心情發展。」

好奇心人皆有之，尤其七小福的男生們，難免對異性胴體感到興趣，元秋續說：「嗰時喺歌舞廳表演，唔係淨得七小福表演嘅，仲有人玩魔術、又有人表演脫衣舞，有啲男仔就偷偷去『裝』人哋跳脫衣舞。」食煙仔、追女仔、舞孃……成為男性七小福的成長經歷。

（十九）