梁漢文（Edmond）昨日出席公開活動，由魔術師Harry哥哥帶領變魔術，大受歡迎。對於老闆黃栢高（Paco）調職金牌大風電影部，Edmond坦言工作未受影響，反而有意向Paco自薦拍喜劇，他說：「呢排主持《美女廚房》，搞到我心癢癢想試吓拍喜劇，等我同Paco講吓叫佢開部戲畀我哋幾個合作先。」
對於新經理人陳輝虹，Edmond有讚冇彈，他說：「其實陳輝虹係個好能幹同聰明嘅大師兄，佢一向都跟開唱片同New Media，我對佢好有信心，（Paco跟鄭東漢不和？）冇可能，佢哋兩個合作咁多年，有晒默契，今次只係Paco想專心發展電影啫。」
