謝安琪（Kay）經歷首場紅館處女甩轆騷後，前晚順利完騷，不過她落力演出都不及陳奕迅（Eason）公然調情兼大講鹹濕笑話搶風頭。Eason以過來人身份叮囑Kay，開騷期間切記要「忍」，禁與老公張繼聰同床洩元氣，Kay聽後不禁面紅，全場爆笑。
前晚第二場《好多謝安琪吶喊演唱會2009》，曾揚言視Kay為「愛將」的陳志雲、劉浩龍等捧場，Eason則擔任表演嘉賓，老公張繼聰在觀眾席招呼嘉賓，為老婆打氣。Kay經過首場甩轆騷之後，前晚表現淡定，沒有甩舞甩歌詞，順利完成。
賴死唔走放笑彈
Eason畀面睇足全場，當Kay唱《十字架》時他更感動落淚。西裝骨骨的Eason現身舞台時，觀眾即瘋狂尖叫。
二人陶醉地合唱英文歌《The way you make me feel》和林憶蓮的《沒結果》，情到濃時更額頭貼額頭和攬腰，狀甚溫馨，懶理老公張繼聰在台下觀眾席
到實。
合唱兩曲之後他們肉緊地擁抱，原本要返回後台的Eason不肯離開，還發揮搞笑本色說：「以為我會瀟灑離開？通常綵排做咗，正式就唔做！」Kay被他逗得哈哈大笑，Eason又說：「你要好好保住你把聲，係一把難得嘅好聲，仲有五場要唱。」然後Eason認真地說：「記得呢幾日唔好同張繼聰瞓，費事損耗精力！」Kay即尷尬說：「又講埋啲無謂嘢！」觀眾大叫：「Kay面紅呀！」她死撐：「胭脂嚟咋！我咁大個人，攬吓男人係唔會面紅嘅。」
憶奮鬥史喊晒口
Kay在前晚第二場騷上回憶七年前與發掘她的唱片監製周博賢奮鬥史時，忍不住再淚灑紅館，場面感人。她又表示希望學林憶蓮多唱少講，她說：「真係好想好似憶蓮咁，每次出場只係講『Hello，大家好！』之後唱歌。」Kay又坦言希望為觀眾帶來歡樂：「我希望帶畀觀眾多啲正能量，用嚟面對近排嘅流感同海嘯。」
另外，張繼聰昨日出席活動時，對太太在演唱會上性感露半球笑說：「我坐下面睇唔到，用感性角度睇太太性感打扮，令我百感交集，性感唔係一、兩個位，連太太內在美都睇埋。」
文：專案組