涉嫌在日本藏毒被捕的Jill，將於本周五（廿四日）在當地出庭應訊，屆時將有不少傳媒飛往當地採訪。而Jill被拘留至今，其直屬家人一直未有現身探望，據知Jill父親與唱片公司經理人會赴日聽審。因日本人着重家庭觀念，而負責今次審理Jill案件的法官平出喜一在當地有「溫情法官」之稱，故熟悉日本法律的大律師林沙文認為身為胞姊的Janice有到場必要。
知名度高反累事
昨日林沙文接受本報訪問時稱，若缺乏親人出庭支持，對Jill弊多於利。他說：「我唔知Janice點解唔去，但上次Jill爸爸喺香港落淚求大家畀機會Jill，日本都有報道。日本人始終着重家庭觀念，多啲家人出席支持，會令法官有好印象。雖然今次主審法官有『溫情法官』之稱，但喺日本一個藝人知名度愈高，法官愈執得緊。Jill嘅藝人身份可能對佢不利，而且單案充滿變數。」
對於早前有報道指Jill案只算性質較輕微的「即決裁判」，林沙文並不同意此說法，他謂：「『即決裁判』判刑上限係一年，但『即決裁判』要喺被捕十四日內上庭，Jill肯定已經超過十四日，所以我相信二十四日只會係『初公判』，即由檢察官宣讀控罪，Jill認罪就進入下一個法律程序，唔認嘅就傳召證人作供，要再排期。換言之，Jill嘅案情比『即決裁判』複雜，唔係一日可以審結。」
盼Jill有稱職律師
林沙文又指，Jill與辯方律師的答辯內容將起決定性作用：「Jill案到依家都冇人知案情發展，只有Jill同辯方律師先知，點解消息封鎖得咁緊要？佢係涉嫌藏毒定係將毒品帶入日本？藏毒，返香港再被拉機會唔高，如果係偷運入境，返香港有機會被拉，好睇律師同Jill叻唔叻，有冇講錯嘢。（你點睇Jill官司？）我着眼點係行李中搜出嘅海洛英分量有幾多，係咪放喺行李隱蔽位置？愈隱蔽，愈可能係處心積慮，我希望Jill有個稱職嘅律師幫到佢。（Amusic或衞詩家人有冇搵你幫手？）冇，如果我為佢辯護，我會用日文喺庭上為佢求情，雖然咁樣做唔知會唔會好啲，但法官或者會有深嘅印象。」
木無表情不回應
另外，自本月十三日生日後一直深居簡出、未有蒲頭的Janice，昨晚八時終於被拍到冒雨外出工作。她前往化妝及set頭，準備為香港電影金像獎拍攝表演片段，看來是希望能盡快完成手頭上的工作，盼公司准許她趕赴日本支持妹妹。未知是否憂心妹妹案情，她由始至終皆木無表情，亦未有回應記者提問。
文：影視組 攝：追蹤組