傅穎入錯key送甩嘴全餐

因連番走音被網友譏為「屎上最強」的Theresa，昨日和小肥在活動上現場合唱《畫紙上的戒指》，Theresa唱歌前已忐忑說：「自己有練歌，每次唱歌前有開聲，做足至出門口，不過現場變數好難講。（有冇信心？）走唔走音好難控制，屋企練冇事，但現場好多嘢令自己做唔番放鬆狀態。」

表現緊張望實小肥

當Theresa和小肥上台合唱時，她還大陣仗自備耳機，但小肥就冇用，怎知Theresa的耳機卻失靈，小肥都替她緊張，不停問：「準備好未？」Theresa惟有放棄用耳機，當她開聲唱歌時，全程表現緊張，只望着小肥，不敢望觀眾，由於Theresa的咪太大聲，而小肥的咪卻細聲，她手指指要音響人員調校，表現驚青的Theresa，唱到出現走音邊緣、甩嘴兼入錯key，但已經比上次《勁歌金曲》全走音時有進步。

事後問Theresa唱甩音，她死撐說：「唔係，咪冇聲收唔到。（入錯key？）應該唔會。（滿唔滿意表現？）聽唔到自己唱乜，今日冇大出錯，覺得自己可以再好啲。」

個場唔係專for唱歌

對於死敵鄧麗欣日前在IFPI頒獎禮上走音，Theresa說：「唔知，前幾日唔喺香港。（吳雨批評歌手唔應該走音、推工作？）我承認自己唱歌有走音，但其他冇。」而小肥就力撐Theresa表現OK，給她75分：「我都差啲甩beat，呢個場唔係專for唱歌。」

此外，吳雨霏前晚出席《美女廚房》，對於Theresa和Stephy走音事件，她說：「對佢哋唔公平，專登聽佢哋走音，希望畀空間佢哋進步，佢哋好努力學唱歌。」 採訪：音樂組