昨日周麗淇（Niki）、王賢誌等以「心晴行動健康情緒榮譽大使」身份出席「抗海嘯．名人名牌二手服飾大傾銷」記者會，Niki呼籲各界踴躍捐輸，更要多關心身邊有情緒病人士需要。
捐衫做慈善
Niki表示已捐出兩大袋靚衫做慈善，她說：「捐衫對我嚟講好容易，因為我好多衫，其實我依家買衫都謹慎咗，情願留番啲錢置業，唔係想買姑婆屋，係想有個好啲嘅竇啫！金融海嘯令人更加關注情緒病，好彩我冇乜損手，但人生不如意事梗會有，最重要係思想正面，我唔開心會搵人傾偈，但好少同屋企人講，怕佢哋擔心，（感情事都唔會分享？）感情係兩個人嘅事，好難講，同家姐都少講，或者喊都係一種紓緩方法。（你早輪唔開心？）我經歷過好多唔開心，（有冇叫鄭嘉穎、佘詩曼做善事？）我唔答呢個問題。」
而王賢誌為做善事不惜割愛，他說：「我捐咗三袋紅白藍，成二百幾件衫，有啲仲未着過，好似其中一件西裝褸原價萬五，未着過！我買嘢好多時係一時衝動，以前要應付幕前需要，所以好多時都係買咗先算。」
想生龍鳳胎
另外，Niki昨日接受查小欣電台節目訪問，被問到感情狀況，她說：「唔係驚咗拍拖，我仍然相信真愛，希望可以組織幸福家庭，生龍鳳胎。（唔結婚只生仔得唔得？）我唔得，有爸爸先係健康家庭。（係咪叫ＴＶＢ唔好安排你同鄭嘉穎合作？）你響全名呀？我從冇咁大power，亦唔做呢啲嘢、唔搞緋聞，一係就真拍拖。（你會主動飛人？）我會好果斷咁睇吓乜事、睇吓咩程度，會畀對方機會解釋。（同圈中人拍拖麻煩？）我冇講過同邊個拍拖，唔理圈內圈外，係好人就得，但09年我會專注事業，拍拖隨緣。（你條五卡鑽鏈好閃。）係屋企人夾錢送嚟賀我生日，我未收過男仔送過萬元嘅禮物。」
文：影視組