本文重點
蔡卓妍（阿Sa）昨舉行首張個人大碟發布會，好拍檔鍾欣桐（阿嬌）為免搶風頭而改以電話祝賀，二人更當眾「講數」。對於緋聞男友鄭中基大讚自己好到爆燈，阿Sa更指對方在其心目中「爆分」！
阿Sa昨出席《二缺一》新碟發布會，這是她入行八年首度推出個人大碟，她坦言心情既緊張又複雜，期間唱片公司高層吳雨向阿Sa送上一支價值三萬多元的咪高峰作支持，香港唱片商會主席江國平亦送上金飯碗和筷子，寓意好事成雙。
阿嬌在發布會上以神秘人致電現場，她說：「你估吓我係邊個？我係阿嬌呀，恭喜晒，今日係你新碟發布會，我一定無限量支持你！」阿Sa即說：「咁你買幾多隻先？」阿嬌回應：「你想我買幾多？盡量啦，我驚定單爆晒買唔到！……我本來好想嚟，但因為要學嘢嚟唔到，對唔住呀，總之你出碟我一定撐你，加油！」隨即遙控工作人員送上柑桔蜜給阿Sa潤喉。
事後阿Sa被問到是否怕阿嬌到場搶鏡，她說：「有好多原因，佢學緊嘢，但你所講嘅都係原因！（鄭中基有冇聽過你隻新碟？）我都未有碟，叫佢自己買啦！（會唔會上《美女廚房》做嘉賓？）要睇檔期，（到時可以再煮即食麵畀鄭中基食噃！）好多人都食過啦，煮即食麵有幾艱難啫！」
被指逼男友感無奈
有傳她向鄭中基施壓，要求對方邀請阿嬌一同上節目，阿Sa無奈表示：「唔知畀咩反應你，咁嘅報道都有！」不過當提到鄭中基大讚自己好到爆燈時，阿Sa又冧爆說：「多謝！識貨！（咁鄭中基值幾多分？係咪爆分？）係囉，跟你嘅答案！」
Kenny否認與關Jill同行
撐場的關智斌（Kenny）否認他和張敬軒在關楚耀（Kelvin）於日本出事前曾計劃同行：「原本Kelvin係有叫過我去，但我有嘢做去唔到，我喺二月一、二號自己去，大概四、五號已經返香港，我都係上禮拜先知軒仔個護照去唔到日本，根本就冇諗過一齊去！（傳衞詩嘅行李被搜出四號海洛英？）冇聽過呢個消息！」他並着大家給Kelvin改過自新機會。
文：音樂組