本文重點
雷頌德（Mark）、蘇永康、鄧麗欣、方力申等昨日出席二手衫活動，有報道指在衞詩的行李搜到疑似海洛英，Mark說：「唔知，未同黎明傾過，暫時無可奉告。（擔唔擔心Jill被控販毒？）冇得擔心，冇嘢可以做到。」
對於衞蘭（Janice）想去探妹妹，Mark說：「過去冇用，只可講日文。」他透露近日忙於錄音的Janice情況幾好：「件事對佢反而有正面影響，仲緊張過以前，心理上得番一個人，更加重要，感情快啲投入，聲線狀態更好。（有冇喊？）冇見佢喊，佢幾堅強。」
「唔好一下判死刑」
至於過來人蘇永康則說：「唔可以求其大麻叫輕，海洛英叫重，毒品冇輕重之分，呢個消息未經證實，如果有要接受法律制裁，希望返來大家接受，我係老油條都諗咁耐，何況小朋友，唔好一下判死刑，Jill唱歌好好，Kelvin係優秀歌手，我重申講句，毒品同酒唔會令大家開心。」