家徒四壁 潘伯求家電
運動員風光背後，不足為外人道者多不勝數。潘繼生憑着了得球技，由香港到廣州任職教練多年，雖然收入微薄，但能憑興趣賺取生活費，惟退休後生活卻捉襟見肘。近日潘伯終獲配公屋，卻無力添置基本家電，甚至需席地而睡，健康亦疑因此每況愈下，希望透過東方日報慈善基金呼籲善長伸出援手，協助添置家具與電器，冀能安享晚年。
「後生嗰陣冇其他嗜好，大部分時間都拎咗去打波，可以打足一日都唔厭！」六十九歲的潘伯自小熱愛乒乓球，更因球技精湛而獲廣州市乒乓球隊聘為教練。談及教練生涯，潘伯即流露神采，「我教過唔少學生，仲同過唔少冠軍級人馬切磋，德國奧運選手嚟廣州嗰陣，我都有同佢交流過！」
「最想有部抽濕機」
為了理想，潘伯曾毅然放下香港的一切，即使退休前每月工資只有約港幣三千元，甚至與妻兒分離仍無怨無悔。不過，在內地生活多年後，潘伯仍然希望回港落葉歸根，惜客觀條件卻未能容許，「咁多年嚟儲嘅錢得好少，喺大陸都仲可以勉強生活，但一返到香港，食幾餐都已經冇晒，仲點生活？」未料正在猶豫之際，潘伯終獲房署編配公屋單位，令潘伯再遇難題。
「之前想慳錢，所以喺大陸買咗啲油返嚟自己油牆，點知搞到敏感，因為冇多餘錢，搞到連床都未有，依家惟有打地鋪，唔知係咪打得地氣多，搞到成身出晒風瘌，冇幾多晚瞓得着。」潘伯懷疑因席地而睡多時，令健康情況每況愈下，「最想有部抽濕機抽走濕氣，同埋有熱水爐沖涼，等皮膚冇咁唔舒服，但真係買唔起。」獲得安身之所固然欣喜，但潘伯眼見身上儲蓄已耗盡，綜援又尚待批核，不禁為添置家電問題而發愁。
愛家（香港）集團有限公司獲悉潘伯情況後，即時透過基金向潘伯送贈一部全新電熱水爐，至於其餘家電，則有待善長施以援手，「其實有個普普通通住得舒服嘅.屋企，每日可以安安穩穩咁抖吓，我就已經好滿足，希望大家幫吓手！」
捐款編號︰12567
記者︰呂耀焜