藥費瀕用罄 眼疾余伯憂心
「打完幾針終於唔痛唔腫，但仲要打多幾針睇吓情況，希望會有善長可以繼續幫吓我！」七十八歲的余國權患有老年黃斑點退化，因經濟拮据一直未有接受治療，直至早前情況惡化至「唔醫唔得」故向東方日報慈善基金求助，獲善長捐助近一萬五千元。經多次治療後情況已有好轉，可惜專戶善款無以為繼，基金已從「醫療專戶」撥款逾一萬七千元讓余伯繼續接受治療，惟未來的治療費用則有賴善長繼續支持。
自從左眼早年證實患上老年黃斑點退化後，余伯的視力便不斷衰退，但因綜援金僅夠生活開支致一直無法儲得足夠藥費治療眼疾。性格豪爽的余伯每當提及「有病冇錢醫」時，神色便驟變黯然，「我後生嗰陣又冇儲錢，到老咁多病痛，自己又搞唔掂，真係好後悔當初唔識諗！」余伯嘆謂，現時政府對老人病的資助少之又少，令不少長者都「諱財忌醫」，如非得《東方》及善長支援，擔心左眼已告失明。余伯暢論肺腑之言後，隨即又回復豪爽語調，更告誡記者要有良好的儲蓄習慣。
每次治療需萬二元
余伯又提及自己年輕時曾習詠春拳，練得好體格，惜歲月不留人，現時雖外表健壯，但內裏卻五勞七傷，「近排隻腳唔知咩事，抽住抽住，落街飲茶要行一陣坐一陣。」余伯慶幸左眼經三次治療後已告消腫，不致每日面對眼腫腳痛無法外出呼吸新鮮空氣，「隻眼打咗針已冇再流眼水，啲腫退咗好多，不過情況未穩定！」
香港眼科醫院稱，經注射三次「樂明睛」，病人左眼視力已由兩成回復接近五成。但早前經臨床診治及檢查後，發現病人左眼視力再次下降至兩成，建議繼續注射「樂明睛」以穩定視力及減低病情復發及致盲機會，倘停止注射病人視力或轉差，而有關治療每次均需港幣一萬二千元。
捐款編號︰12135
記者 林永發