中醫理論會根據食物嘅顏色歸類為唔同屬性，再以其屬性嚟判定其補益功效，而黑色食物就被認為係益腎之選，所以一身烏卒卒嘅烏雞係其中一種對男性有補益功效嘅佳品！
烏雞又稱為武山雞、烏骨雞、竹絲雞，據講源自於中國江西省嘅泰和縣武山，被飼養已經有超過2,000年歷史。根據中醫學理論，烏雞味甘，性平，入肝、腎、肺經，具有多種補益功效，好似《本草經疏》就有以下記載：「補血益陰，則虛勞嬴弱可除，陰回熱去，則津液自生，渴自止矣，陰平陽秘，表裡固密，邪惡之氣不得入，心腹和而痛自止，益陰，則沖、任、帶三脈俱旺，故能除崩中帶下一切虛損諸疾也。」
另外，日本《本草食鑒》亦註明：「婦科的各種疾病，各種虛症患者以及久無子嗣者均食用烏雞。烏雞亦可對男子的體衰羸弱、遺精、陽痿等症以補益。」由於烏雞嘅藥用同食療價值都好高，所以一直被視為「名貴食療禽類」。
烏雞除咗有優良藥用價值，亦含有豐富營養成分，特別係氨基酸含量高，種類多達18種，當中包括8種人體必需氨基酸。另外，烏雞含有多種維他命（包括B1、B2、B6、B12、C、E等）同礦物質（如鈣、磷、鐵、氯、鈉、鉀、鎂、鋅和銅等），真係好有益。